ياماحلا عقب المطر شبّت النار ..

من القديم ..
اتمنى ان تروق لكم والله يجيب المطر .

[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياماحلا عقب المطر شبّت النار = في خبة ٍ ماداج فيها شواوي
ربيعها ضاف ٍ على ساير الدار= فيها النفل والقحويان متساوي
أرض ٍ خلا يطرب لها كل زوّار = يطرب لها اللي للتمشي هواوي
فيها الحيا والعشب طالع له أزهار= وفيها الخباري لون ماها سماوي
والصيد فيها له معدل ومقدار = صيد ٍ عن ضعوف العزيمه خلاوي
فيهالحباري والارانب لها كار =منوة ٍ رجال ٍ يكرمون النداوي
وإن صار معك من الطحاطيح الاخيار= ثلاثة ٍ ما يخلفون الهقاوي
وعزبتـْك مكتمله على كل معيار = في وسط صندوق ٍ للاغراض حاوي
به دلتين ٍ صفر مع بنّ وبهار = ومحماس ٍ مخصص لحمس القهاوي
يعجبك ليامن صار للجمر مسعار =والنجر دنّ ومعك تمر ٍ حساوي
وشاهي وسكر مع فناجيل ٍ كبار = ماهي فناجيل الضعيف الدناوي
وموترك جيب ٍ من تصاميم فكسار= للهقوه الزينه شريك ورهاوي
سبيرين مكرة سحب من غال الاسعار= منوة شجاع ٍ للمطاريش ناوي
ماهمه الرمله ولا همه القار = يقطع بك الفرجه ويرد الحراوي
إن جيت في روض ٍ خضر فيه نوّار = ممطور ٍ البارح من الناس خاوي
لاهوب لا قاره ولا غابة أشجار =ياطيب ريح النبت كانك هواوي
وشبيت نارك سمر ٍ يسر الانظار= ماهيب نار اللي من الضعف هاوي
وصلحت لك دله بعد هيلها فار = ينعشك ريح الهيل والخير ضاوي
وعلى خوياك الكيف برفوق يندار = ماهوب كيف أهل الشيش والقهاوي
هذا منا قلبي ليا قلت أبا اختار = ابعد عن اهل البلبله والدعاوي
اللي لهم في ساحة الذل مبعار= ناس ٍ صداقتهم تجيب البلاوي
ناس ٍ صداقتهم على اهل الوفا عار = يجيك واحدهم عما قلب .. واوي
طراد حكي .. بهيم .. هذار .. مكار = ياضنوة ٍ قشرى يا هاك الضناوي
فرقاهم احسن لي والاوادم أحرار = وانا عن الزله حريص ٍ حياوي
أبعد جنابي عن هل البوق الاشرار = والطيب عندي من كبار المناوي
[/poem]