(( أنا أحسبني شاربٍ فنجاله //// وأثره هو اللي شاربٍ فنجالي )) ...

الأخوة والأخوات الكرام

أسعد الله جميع أوقاتكم بكل خير

خفيفة أقبلوها كما أتت تلك الليلة ....



[poem=font="simplified arabic,6,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
رقمٍ يناديني على جوالي=وأنا بقمة حوستي واشغالي

رقمٍ ما أعرفه لا ولا أدري منهو=وحسّيت في صوت المعنى عالي

وساعة ضغطت الزر الأخضر جاني=صوتٍ شغل فكري وغيّر حالي

يقول لي كيفك وكيف احوالك=بالله قل لي كيف حال الغالي

قلت أنت من ياللي تنشّد عني؟=من قبل لا ابديلك جميع أحوالي

قال المعذب من غلاك وحبك=ياللي عن قليب المعذّب سالي

ما تدري انه قد ضناني شوقي؟=ومافيه يوم الا تجي في بالي؟

دايم أهوجس بك وأخطط وأرسم=وأبني على قربك جميع آمالي

من كثر ما أحبك وأهيم بحبك=أشم حتى نفحتك في شالي !!

وأردد أسمك كل يوم وليلة=حتى كتبت أسمك على سلسالي

قام يتكلم عن غرامه فيّه=وأنا معه بشوف ويش التالي

وساعة خلص من هرجته بادرته=قلت أستمع لي جعل مالك والي

أنته وش اللي جاب رقمي عندك؟=ووشلون تعرفني وانا بلحالي؟

معرض عن أهل الحب ماني منهم=لو كان جسمي من عناهم بالي

لكن تردعني مخافة ربي=ثم سلم ابوي وطيب عم وخالي

وأخشى على نفسي تزلّ وتهلك=في حب مصلحجي أو استغلالي

وأخاف أشوّه سمعتي وأعميها=وأنا على روس القمم منزالي

لأني من أرجالٍ تقول وتفعل=وألهم محلٍ في المكارم عالي

أنا سليل أهل الوفا والشيمة=من طيب ماضيهم تطيب أفعالي

ألهم علي أحرص على سمعتهم=وأصونهم في أقفايتي واقبالي

قبيلتي وافخر بأني منها=هي مسندي هي محزمي وظلالي

أنا بدوي يابنت ما ارخص نفسي=وبين الرجال أهل الكرم مدهالي

ما اعرف ياكود أكرم واشبب ضيفي=واسوق له كرامته من مالي

وان كان ضيفي للردى يجذبني=أشوم عن دربه تراه وأشوالي

واللي بداره مايوجّب قدري=أشد عن داره واسوق ارحالي

وان جاتني زلّة رفيق أدمحها=واغفر له الزلّه لأنه غااالي

وإذا نخاني غاليٍ لبيته=ورميت لجله غترتي وعقالي

ووقفت وقفة صاملٍ ما اثنيها=وارخصت لجله مهجتي وريالي

واللي اعزّه أشركه في اللي لي=ما اقول ذا لك يالرفيق وذا لي

ولا أحط نفسي في المكان الطامن=واعرف لمخراجي قبل مدخالي

قطع كلامي له وقال اسمعني=أما انت رجعي او بعد متعالي

وإن جاء ببالك يوم بتكلّمني=أسمي عرفته وتعرف جوالي

لكن لا تطري علومك هذي=وان كان ذا علمك فلا تسعالي

سكّر وانا سكّرت خطي دونه=لكن سلبني خافقي طوّالي

أنا احسبني شاربٍ فنجاله=واثره هو اللي شاربٍ فنجالي[/poem]




وسلامتكم جميعاً