العبره اللى من سبايبها يضيقن الصدور (قصيدة الغربه)

بسم الله الرحمن الرحيم

أبيات من قصيدة الغربة
كتبتها في عيد الأضحى الماضي 1429هـ
في ولاية أدليد _استراليا

[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]



العبره اللى من سبايبها يضيقن الصدور=يوم أتذكّر عيد أهالينا وعيد أقرابنا
يطري عليّه بعدها بعض السوالف والأمور=وأقول في نفسي هنيّا ياعرب وش جابنا
هواجس تطري على الشاعر وفي صدره تفور=بأسباب غربتنا وبعد اديارنا واحبابنا
ف(ادليد) ديرة مصنع (الواين) وتكرير الخمور=الله لا يبلانا ولا يبلا جميع أصحابنا
فيها اختلافات الثقافه واحترامات المرور=وكلابهم يابو سعد ماهيب مثل كلابنا
حنا نهمّلها مع الخليان وانطخّ العقور=والاّ هنيّا لو تعرضنا لها يا,,وابنا
وممكن تساوي غلطه الشاطر على فعل امحذور=غرامةٍ ماقد طرت في بالنا واحسابنا
لكن يزينها هدوء البال وأنفاس الزهور=وأيضا يزينها مقابل ربعنا وأعرابنا
وحنا حضرنا من بعيد الدار وأسباب الحضور=ناخذ علوم (أدليد) وانصون اللحى وأشنابنا
نصونها عن مسلك التغريب ودروب الدبور=لو كان بدّلنا منازلنا ولبس ثيابنا
واليوم يوم العيد والدنيا على راسي تدور=ما احد درى باعيادنا ومسكرينن بابنا
لاجارنا سير علينا وأردف الدله بخور =ولاشرّع البيبان من بدري ولا هلا,,بنا
عوايد نفخر بها لو كان من ماضى العصور= وان كان ما نفخر بماضينا عساه اتلابنا
وبنتي بشاير في مقابلها السعاده والسرور=مير البلا في عينها شفت الوله لاقرابنا
والجا الى الله وأطلبه وأقول يالرب الصبور=عليك نتوكل ومن فضلك تطول أرقابنا
هوّن علينا لوعة الغربه وضيقات الصدور=ويسّر لنا حتى نعود وفاليمين كتابنا

[/poem]

ابو بشاير

استراليا -أدليد ___10-12-1429 هـ