رساله الى اخي

مساء الخير على الجميع

هذي قصيده من الارشيف كتبتها وكان سببها لما وادعت اخي عندما كان في صالة الانتظار في المطار ..
وكان ينتظر وقت اعلان ذهاب الرحله وهي رحلة الى دوله اجنبيه للدراسة

وبصراحة عند وقت الموادع هلت عيوني بالمدامع وكتبت هذا المطلع وكملت القصيده ورسلتها له

ولما قراها رد علي وكان رده يثبت انه يعلم مافي خاطري



وقلت فيها بعد ماهلت دموعي ...

الا ياحمد هلت دموعي بسبتك
ودمعة عيوني بالخدود تزيد

احاول اخفي دمعة العين لاكن
حزني غدى وسط الضمير شديد

انا ضايقً صدري وبالخد مدمعي
ومن كثرت احزاني كـتبت قصيد

اقولها والهم يشهد بقولي
والله تعالى بالكلام شهيد

معادبه شيً يسلي بخاطري
ماغير همً في حشاي جديد

ياكيف انا ماضيق والهم بالحشى
كني بعيرً قيدوه بقيد

ومن بعد ضيق البال والهم والحزن
بهديك انا ياخوك راي سديد

ونا بنصحك ياخوك وسمع نصيحتي
دام النصيحه بالزمان تفيد

اترك ضعيف النفس لا لا تصاحبه
لاتـتبع ادروبه تراه بليد

ولاتـتبع الخبلان ون زاد طيبهم
اللي على وقت الصعاب جحيد

محدً يفيدك ونت داري بمقصدي
ماينفعك ياخوك غير عضيد

وبي تـنـتبه من عالمً تخفي البلا
ونا واثق انك يالعضيد تصيد

ترى الناس تخفي مكرها لوتسترت
اخذ الكلام وجاك علم وكيد

ابي تغتم وقـتك وحذرى تضيعه
على شان كل القوم فيك تشيد

ترى الوقت مثل السيف وبغاك تـنـتبه
اغنم زمانك ونت حر فريد

وبنصحك لاحل وقت الفريضه
انك تصلي ياعساك سعيد

ترى الفرض واجب ونت مسلم ومستقم
ترانا ترانا للإله عبيد

وبي تـتلو القرآن بالصبح والمسى
مدام القرايه بالكـتاب رصيد

وحاول تسلي خاطرك في بلادهم
وكـتب من ابداع الخيال نشيد

واليا جذبك الورق لالاتجاذبه
خايف تهل الدمع ونت وحيد

انا خابرً قلبك رهيفً وممتلي
بالحزن دامك للعيون بعيد

تصبر وكافح يافتى في حياتنا
يالله عسى ترزق بعمر مديد

وباخر كلامي لاتضيُع نصيحتي
مدام النصايح لرجال تفيد

__________________________

وبعدها بيومين رد علي بهذا الرد الجميل

وقال فيها..

هلا باللذي يرسل علينا كـتايبه
وينصح عضيده من مكان بعيد

أنا اسمع صدى صوتك ولو دونه البحر
وجاوب على طرقك بقول نشيد

أذا كان حزنك ياعضيدي على البعد
فنا مماتي فالبعاد وكيد

لكن وقـتي يامحمد بسايره
الوقت يبغى والزمان يريد

وخوك يامحمد على منت خابره
زهيد من حيـنه ويموت زهيد

مترك عمود الدين وكـثر نوافلي
وقيام ليلي فالظلام يزيد

وصوم وغض البصر في مسيري
ومحاسب المنكب علي شهيد

وقراء من القرآن كل ماتيسر
وقراء رياض الصالحين وفيد

ولا ارضى على ديني مهانه من العدو
لوكان حد السيف فوق وريد

وفي صحبت الأجناب ماني مكـثر
لو كان يصفى بالصعاب وحيد

وماخاوي الحر الردي لجل منسبه
وشلي بـ حرً بالرذال يصيد

وبشر بقولة نعم لاجابو اسمي
في غربتي عندي غنات رصيد

ولك وعد مني ما اغير سلومي
ولاتبع من الغاوين كل مكيد

هذا وصل الله على سيد البشر
شفيعنا يوم الكـتاب شهيد


وسلامتكم