وش عاد باقي من شروط القيامه !!

هذه القصيده ترحيبيه بمناسبة زواج اخوي : سافر بن عايض الروقي في رابع ايام عيد الفطر المبارك ..واريد توثيقها في مرقاب الشموخ ,,ودامت افراحكم ..

[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]

بسمي وبسم ابويه معدل الميل =اللي بنى للمجد هامه وقامه
عاش فزمان المعمعه والغرابيل =لين اقتسم فالطيب ذروة سنامه
الشايب اللي من ثقات الرياجيل =السجده اللي في جبينه علامه
مايستمع من ينقل القال والقيل =ولافيه عرقٍ من عروق الرخامه
السانه اعضب مع قليل المحاصيل =ولامع الطيب ما غير نظامه
يشيل ملاشال شقران وشعيل = من دون ربعه ماتراقل عظامه
مجالسه لعزاز الانفس مداهيل =ومرضعته ديوس التجارب قرامه
سلايل شيوخٍ ثقات ودواليل = الصف واحد ماسعوا في انقسامه
حماية الميقاف جيلٍ ورى جيل = اهل الاشده محتمين الجهامه
يوم انها بالجيش ومطارد الخيل = الاد روق اهل الظفر والزعامه
صغيرهم ضاري بشرب الفناجيل = وعدوهم بالعين شاف انهزامه
واقول في كل القبايل مشاكيل =تاريخهم يفرض علينا احترامه
يامرحبا ترحيبةٍ توفي الكيل= فيها معزه واحترام وكرامه
على الشحم والعود والبن والهيل = ترحيبةٍ تبقى ليوم القيامه
بضيوفنا روس الرجال الحلاحيل = اللي حضر من نجد ولاتهامه
بعد وصلتهم من جهتنا المراسيل = ماجابهم غير الوفا والشهامه
ماللضيوف الا معزه وتكميل =ورثٍ نورثه الذي في فطامه
كلمة نعم ماحازها بارد الحيل = ولافاد خير ولاتحقق مرامه
واللي طموحه من ورى الجدي وسهيل =يكرب لتكميل اللوازم حزامه
ويالله يامنشي صدوق المخاييل=يافارض الشهر الكريم وصيامه
يامنزل القران وكتاب الانجيل = تقبل لنا صوم رمضان وقيامه
الفايز اللي بين ذكرٍ وتهليل = والخاسر اللي غاطسٍ في منامه
مانظمن نعيش السنين المقابيل =و تقصيرنا يجلب علينا الملامه
والنفس طيرٍ والخطايا محابيل = بيتٍ لروقيٍ صدق في كلامه
وانفوسنا شابت على الحط والشيل = نتعب على المال ونجمّع حطامه
نطرد ورى الفتنه جموع وزرافيل = في قلوبنا غفله ومعنا غشامه
ياالله تنجينا يامنجي سماعيل = واليانزلنا القبر تجلى ظلامه
وارحم عبادك يامغيث المقاليل = وش عاد باقي من شروط القيامه
واجعل لنا في كل صعبٍ تساهيل = وهيئ حلال الرزق وابعد حرامه
دنيا الشقا دنيا العنا والبهاذيل =والدين يحفظ للبنادم مقامه [/poem]