زحمــة كــلام ودمــع

مرثيه في الشيخ سلطان بن جهجاه بن حميد رحمه الله وغفر له وسائر اموات المسلمين ... آمين



[poet font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
الدمع ما بلّل كموم و مناديل=بلّل قلوب الناس وأدمى حشاها
وأصعب بكاء - بكي القلوب المعاليل=وش انت يا ملح المحاجر وماها
الدمع - دمع الأفئده والهماليل=من سبّلت كل المحاني مداها
ضاقت وسيعات الصدور المداهيل=بالحزن والضيقات لا واعناها
لقى عليها الهم باب ومداخبل=حتى تفرعن فالضلوع ورقاها
واخذ يرتلها على الضيق ترتيل=حتى إستوت منبر شجون وتلاها
للحشرجه وسط الصدور المواويل=وألاّ الذيابه يوم تقنب عواها
والموت هدام الملذات والحيل=وخنّاق الأنفس لا دنا واعتراها
في كل يوم يحط فالناس ويشيل=ولا نشد عن غيضها من رضاها
والناس ماهي للخلود التماثيل=مدامها حيّه قفاها فناها
بس الفقيده في رحيله بهاذيل=وسلطان موته كسرةٍ ما وراها
( ما مات رجّال وتعوضه رياجيل )=ماتت بلاد إب مدنها وإب قراها
ومن السما طاحت بموته قناديل=وخفت من شموس المكارم سناها
ومن الصخاء شلّت اكفوف ومكاييل=ياما بجزلات العطايا ملاها
ومن الفضيله مالت أبراج والميل=حل بديار الجود واربك حجاها
في غيبته عزّا الجدي مطلع اسهيل=وعزّا النجوم المرقبات وسماها
وعزّت عليه الخيل مرابط الخيل=وسروجها وأرسانها وامْعداها
والقود تخلج والثمر والمحاصيل=سنبل بها حزن الرحيل وطواها
وألاّ السيوف المرهفات القواتيل=سلاّتها تنعى القضاء في حداها
وعزّت به ( الهيلا ) بعضها مغاليل=وعزّت به اجناب الرجال اقرباها
وعزّا الحجاز جباله السود والسيل=عزّا الحجيج وبادلته بدعاها
والورد وأزهار الشفا والأكاليل=على فضاء الطايف عزاها شذاها
ونجد الشكاله والكرم والمشاكيل=عزّت قبايلها على ما دهاها
مجالس الاجواد عن كل تعليل=يرودها حزن الفراق وحكاها
وامست تسامر ضيمها والمعاميل=واحسن عزانا الله واحسن عزاها
فاللي حياته مدرسة جيل عن جيل=نتاجها حمد الرجال وثناها
له فالحناجر كل ما ينذكر قيل=نعمٍ يردد فالحناجر صداها
( سلطان بن جهجاه ) والسيره النيل=وبجاله غصون المديح ونماها
على ضفافه للشواهد دواليل=ومن الشجر طيب العروق وزكاها
عليه زاحمني كلام وتفاصيل=وإليا ارتبط فيه الكلام يتباها
كن الكلام البيد واذكاره السيل=والسيل لا مر البسيطه حياها
من يمّه الطاري مزايا وتبجيل=والطيب والكف الجزيل ورهاها
ومن يم جدّانه فمي يمتلي هيل=وأرمي عقالي للفعول وطراها
كم سرّجوا للمعضلات المشاويل=وكم درّجوا على المهانه رحاها
بأرماحهم جاء للمنايا مراسيل=من زرقها تلقى الضواري عشاها
لطّامة العيّال ذبّاحة الحيل=مقادم ( عتيبه ) وقادة لواها
تاريخهم جغرف اديار ومنازيل=يوم الديار اديار للي ولاها
وشهودهم منها حيود وغراميل=يحكي حصاها ويتكلم ثراها
لقبورهم غيث الحيا والمخاييل=ولعظامهم برد الجنان وجناها

[/poet]

وتسلمـــــــــون