صوت .. و صدى .. !!

السلام عليكم ورحمة الله وبركاته



هذي قصيدة مسندها على الشاعر / مسفر مبارك القحطاني


ويقول فيها /



[poem=font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
أنا لا تذكرت الزمان وغرابيله = وشين الظروف وعسرها قلت يا كافي
وعزي لقلبٍ صابه الهم عزيله = يصارع زمانٍ ما لقى فيه الانصافي
يسوقه نهاره لين يضوي على ليله = هواجيس فكرٍ ضيّعت كل عرافي
ألا ناض برق الصيف ونشت مخاييله = يصيبه على ذكر المحبين خفخافي
على صاحبٍ ما عاد جتني مراسيله = رماني على شوك المحبه وانا حافي
عطاني عهد واليوم شح بمواصيله = حسيبي عليه اعداد من حج واطافي
ولا شاف دمع العين غرق مناديله = عيون الشقاوي دمعها يذرف اذرافي
طريق المحبه لا تصلفق معاميله = كفايه كفايه ما حصل يالغضي كافي
حبيبٍ تناسى معرفتنا وحبي له = شبيه الغزال اللي رعى عشب الاريافي
جمال الطبيعه والحلا في تعازيله = عديم الوصايف ما خذاها تسلّافي
ذبحني بعينٍ زينها في مظاليله = كما عين حرٍ ماكره كل مشرافي
حياتي وروحي عقب فرقاه وشهي له = ياربي تعين ويستره سترك الضافي
سقى رايح الوسمي ليا انشت هماليله = تعزل ربابه والرعد له تقصافي
مزونه ليا بهش مطرها درج سيله = وصار النبات أشكال والوان واصنافي
عساها على دار الحبيب ومداهيله = على نجد ديرة صاحبي زين الاوصافي
ألا يافهد لا عاد حيلٍ ولا حيله = أكن المرض واقول طيب ومتعافي
ولا غيرك اللي ساعة الضيق بشكيله = والاعمال بالنيات والموت قصافي
صبرنا ورددنا يا دنيا من انتي له = من اسباب وقتٍ يافهد بيح الخافي
وتركت الهوى واحرقت باقي مراسيله = وما فات مات ولا يفيد التحسافي
تركته وبابه ما بقى غير تقفيله = رجعنا من المشوار واعلنت الانكافي [/poem]ورديت عليه وقلت /

[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
نظرت الجواب بعمق أفكر بتحليله = واقلبه لين اشوف راعيه وش شافي
وقمت اشبره وذرعه ووزنه وآكيله = على شان يطلع رد وافي على الوافي
وليل الشعر ظلّم وولعت قنديله = وسرّيت قافيتي على نور كشافي
ومسفر يغنيلي من اروع مواويله = وأصغيت اذني لين شبعت من القافي
من الحزن والاحباط في القاف تشكيله = موسيقى حزينه عكّرت جوي الصافي
زمانك يا مسفر غامض وصعب تأويله = تصيبك محاذيفه ولا تشوف حذافي
أدر ظهرك لماضيه وانطح مقابيله = ولا يهمك المقفي وركز على الافي
وماكتبلك بيجيك ولا انت بتجيله = حقيقه ولا فيها نقاشٍ ولا خلافي
عليك احتساب الاجر وابشر بتحصيله = من اللي يجازي دون ظلمٍ ولا جحافي
وتشكي على من الغرام وبهاذيله = وهيّضت قلبٍ فالهوى شاف ما عافي
طريق الهوى فيه ألف حفره وتحويله = يبيله ولد حرّيف مع كل محرافي
وليفي قدهنا سنين ما عاد له زيله = نسيته وماضيه الغبر شتّه خلافي
وقلبي فطمته من وليفه ومن جيله = نفضته وحزن القلب روّح مع السافي
تناساه يا مسفر وقطع محابيله = قبل لا يقطع قلبك أرباع وانصافي
مدامه نسى حبك وعرفك لا تبكيله = يا مال الغنيمه لا تحسّف على الجافي
أنا احسبك لوانك تبي طويق بتشيله = واثر قلبك اصخيف واحاسيسك اصخافي
حنيّن يا مسفر بس ذا الوقت يبغيله = قلوبٍ كبار ضلوع ما هيب بتخافي
ترى الحب ماله طب ولا شيخ يفتيله = تبصّر بقلبك قبل يسرف به اسرافي
وما صعب شيء الا على الله تسهيله = وهذي الحياه حمولها ثقال وخفافي
وهذي نهاية رد قولي على قيله = من اعدادي وتقديمي وفكري واشرافي [/poem]
وســـــلامــــــتكم ،،