بين العراقيين, والاردنيين..(ياطير)

السلامُ عليكم


من عيون الشعر... للشاعر الكبير عبدالله بن عون:



يا طير عقبي كن خاطرك شاين
خاطرك شين وغيبتي عنك يومين

النقص فيك مبينٍ له بواين
في لمعة الريشة وفي ناظر العين

يا طير أنا وياك كنا خداين
وبيني وبينك ولف ومعاملٍ زين

يوم نتخاوى مع وجيه الضعاين
ونهمل سبقوك في مناكب خسيرين

ولا شمال الهضبتين القراين
شرقي طلال ومن سواحيق ويمين

والا عطينا سكة التابلاين
ولا قد عطيناها عليهن حراذين

نصبح على طارات شهب المكاين
بين العراقيين والأردنيين

في خايعٍ به كن عيني تعاين
ربد الحباري به على أربع وثنتين

وناخذ لنا أيامٍ بذيك الدفاين
ما بين برقع والغدف والبسيتين

ونكسر على ما ينحدر من ضواين
وناخذ هناك اسبوع ولا اسبوعين

وننكف نشاط وسالمين الصخاين
ولو كان نتعب عدنا مستريحين

قدام يطلع للصقارة زباين
ناسٍ تحوش القوبعة بأم روحين

ليا روحوا بمشحنات الخزاين
ما في نحاهم ذوقوه الأمرين

واليوم ما بيني وبينك مداين
أنا سعودي وانت جايٍ من الصين

وأما لقينا للحباري عواين
ولاّ توادعنا وداع المحبين

الوقت ما تاليه معنا بزاين
والبر في حادور من حين لاحين

أدناه مليانٍ كراتين فاين
واقصاه ضاق وضيقو به هل الضين

وضاقت مناهج طيبين الضغاين
اللي على المقناص بالطير ضارين

واليوم كان اللي يحاكيك ماين
هذي سبوقك وانتهض بالجناحين

وهاجر مهاجَر مبحرات السفاين
للصين ولاّ اهبط على ضلع قزوين

لو كان عندي ما فراقك بهاين
حنا عزاز ولا نهين العزيزين

خلك تروح ولا تشوف الغباين
شاملك عفوٍٍ مثل عفو المساجين
.
.