وتبقى الاثارة ملفته 00 والشعر غير

[poem=font="Simplified Arabic,4,blue,normal,normal" bkcolor="transparent" bkimage="backgrounds/6.gif" border="none,4,gray" type=0 line=0 align=center use=ex num="0,black"]

الضيق ريحٍ عاتية والفرح طير=اتلا العهد به يوم قفت به الريح

والقلب شجرة غادرتها العصافير=وقامت تموت شوي 00 وشوي وتطيح
والشعرلاستحكم ظلام الدياجير=إطلالته فرحة 00 وأمان 00ومصابيح
عنيت له من عِقد في جيدها الخير=صفرا ماشد عنانها ( زين تصفيح )

كم لي وأنا أقطع في طريقه مشاوير=وأرتب حروفه لبوح المجاريح

لكن تساوت ملحها والمغاتير=وغطت على صدقه دموع التماسيح

ولا عاد له من سوء حظه معايير=وبوابته مفتوحة بدون تصريح

من يوم صفوا في طريقه طوابير=الرابح اللي مبعدٍ عنه ومريح

لكن ياللي لك معزة وتقدير=خذها نصيحة صادقة دون تجريح

يالشاعر اللي من حساب المشاهير=فهمك لمغزى الشعر يحتاج تصحيح

مريت بك ودلال شعرك مباهير=وصبيتها مدح لنفسك 00 وتطويح

تومي بيدّينك تقل ودّك تطير=وتطير عيونك على الناس 00 وتصيح

كنك بحومات الوغى سالم الزير=والا معك شلفى العطاوي شليويح

يا بن الحلال الشعر فكرة وتصوير=وعن بهرجة قولك يكفيك تلميح

الشعر رؤية مستنيرة وتفكير=يستشرف أحداث الليال الملاقيح

رسالته وعيٍ ونضجٍ وتأثير= بفكرة دلالتها غموضٍ وتوضيح

للي يجيد المشي بين المسامير= ويحط من حول القفول المفاتيح

الشعر روض عامر بالنواوير=الى تساما مثل صدق التواشيح

لا تحسب أنه في كفوف الجماهير=اللي تصفق كل ما أزددت تسطيح

اعجابهم : فوضى وضوضا ، وتصفير=ومفهومهم للشعر : حفلة مراجيح

يعني إعجابٍ ينكتب بالطباشير=ثلج تجيه الشمس ، وبلحظه يسيح

وتبقى الاثارة ملفته 00 والشعر غير=لو التشابه يجمع الورد والشيح

قصيدة من قبل عهد الاساطير=وسط الصدور مخلدتها التباريح

وقصيدة يعزف لها بالمزامير=ترقص وهي جثة 00 وتحتاج تشريح

طال الكلام 00وطار من شجرتي طير=اتلا العهد به يوم قفت به الريح

من بعدها يالشعر تصبح على خير= لا مشغلٍ بالي 00ولا ظني مريح[/poem]