والى ذكر في نجد ربعه واهاليه=تقول يصلى فوق حام الوقيده بين السلوم والعطاوي!!!

قصيدة الشاعر عبدالله السلوم رحمه الله

[poem=font="Simplified Arabic,5,blue,bold,italic" bkcolor="transparent" bkimage="" border="none,4,gray" type=1 line=0 align=center use=ex num="0,black"]
ياقلب ياللي صالي الهم صاليه=يمسي ويصبح في هموم ٍ شديده
همٍ يبعد به وهمٍ ويدنيه=مجروح ويصارع حياةٍ عنيده
والى ذكر في نجد ربعه واهاليه=تقول يصلى فوق حام الوقيده
ماتنفع القلب المشقى هقاويه=ليا صار بالغربة وداره بعيده
طيفٍ سرى من نجد والشوق حاديه=بالحلم صوّر لي وجيهٍ عديده
اعلنت حبي له وانا قبل مخفيه=ومن مات لجل الحب نفسه شهيده
خطي لابو نواف يامن يوديه=ومضمون مابه يفهمه بالقصيده
رفيقي اللي حق مانيب ناسيه=لعل نفسه في حياته سعيده
لو كنت بامريكا فلا غاب طاريه=حيث الوفا بالود عندي عقيده
ياشيخ لاشفت الضبا في مفاليه=يرتع ومعه القايده والفريده
او شفت لي جوٍ تطارد حباريه=ماصادفن ضربات حرٍ مجيده
قلت آه لو ينفع لمثلي تمنيه=انك ومعك ابو السجايا الحميده
عبدالله النايف رفيقك وانا اغليه=لو نفترق من بيننا بالبديده
انه يجي مقانصكم في حراويه=لاشك ماهيب التماني مفيده
انتم بعيد ولاش حيٍ نصافيه=نظرات بعض الناس صارت زهيده[/poem]


رد الشاعر عبدالرحمن العطاوي(شاعر هوازن)

[poem=font="Simplified Arabic,4,darkblue,bold,italic" bkcolor="transparent" bkimage="" border="none,4,gray" type=1 line=0 align=center use=ex num="0,black"]
ياقلب ياللي داعي الشوق داعيه=واهواجسي ماهيب عني مهيده
غرب نديمٍ لي وقلبي يباريه=في وسط نار الوجد جالي وعيده
دايم وطيفه في حلا النوم اناجيه=والى انتبهت الهم جالي قعيده
عبدال مثلي يشتكي حب غاليه=لولاه فرج همنا بالنشيده
حي الكلام اللي جسامٍ معانيه=بالعون كل نفوسنا له مريده
دايم وهاد الناس للرشد هاديه=وهذي تراها فكرةٍ له سديده
الحر مثلك طيباتٍ مباديه=انا اشهد انك يابو مقبل وليده
لا غاب هاجوس العفون المداليه=هواجسك ماهيب عنا محيده
تذكر لنا دارٍ بها الصيد تطريه=ريضانها خضر وهواها بريده
لاشك عنا ناحيه قل واليه=ولو هوزها لك نجد عندي وحيده
الى طفح عشب النفل في خباريه=في كل يومٍ في رياضٍ جديده
والطير بانت فالحباري مهاويه=هذي طيار وذي ربوضٍ مسسيده
في خايعٍ تشكيل الازهار غاشيه=ماصدرت صاره ليا جال ضيده
وكل معه طيرٍ الى هدّ يشفيه=مخالبه لاجوالهنه مبيده
هذا الكلام اللي كلامك يداويه=يشريه لو ان القوافي امكيده
أنا دريت انك على الطيب بانيه= وطاحت على ذولاك منك النضيده[/poem]



لكم فائق احترامي وتقديري