دكة مغترب ..

ياجماعة ..
اول شي كل عام وانتم بخير والشهر مبارك


همسة لكل من اراد الرد مشكور ( لبى راسه ) ..

- قبل ان تبدأ بالرد اجب على السؤال التالي :
* مرقاب الركن الهادئ ابــداع بــلا ..........................

يالربع .. يالربايع
الكرام .. الكريمات

^
^
^

هذي بس لزوم البروتكولات << ناوي يخربها من اولها ..

ماعلينا .. خلوني هنا افضفض شوي يعني كل مايكتب هنا وجهة نظر واشياء ناتجة عن طفش ..
اعجبتك اوكي شي حلو ومرحبا .. مااعجبتك حب لي خشمك اذا قدرت واضغط على الاكس اللي في اعلى اليمين وشكرا ,,

ياجماعة من جد ..

في لقاء سابق لاحد الاعضاء لايحضرني اسمه ..
يقول الرجال في احد تصريحاته ان الركن الهادي موضة وبتنتهي قريب .. او حاجة زي كذا
تصدقون انه صادق << في ذمتك

بس من جد ياجماعة اكثر المواضيع اللي فتحها الشباب في الركن الهادي يتمنى انه يحذفها وهذا اذا مابعضهم حذفها لانها كانت تجربة فاشلة ومن الاخر شاف الناس مسوين صفحات وجاك مطبح على وجهه وسوا مثلهم بس ماش ماضبط الوضع معه ..
يمكن اكون انا اولهم .. صراحة قلت موت مع الجماعة رحمة وسويتها وهالحين اشوف ان مالها داعي واتمنى حذفها ..

الزبدة ,,
ان التقليد يضر في كل الاحوال وياجماعة بلاشي نسخ كربونية تعبنا والله من هالنسخ

باك

هالحين ودي اسولف عن المحاورة وقسمها هنا ..
انا ماني من عشاق المحاورة ولكن لامانع من الفرة في قسم المحاورة ,, لي كذا محاورة مع اشخاص معينين والسبب هو وباختصار كنا نسولف في المسن وقالوا خلنا ننزل في الميدان والميدان ياحميدان طبعا على حد تعبير بعض الشباب اللي يعتبر ان المحاورة وميدانها معركة بدر والا احد وهي سواليف بدو على جال ضو وخصوصا اللي في المنتديات كلها سواليف من ورا كيبورد بالعربي هرج السعة ..
المهم لاحظت شي هنا اعني قسم المحاورة ,

لاحظت بعض الاسماء اللي ماتلعب الا مع اسماء معينة يعني لما تشوف اسم زيد دور عبيد وان لقيت عبيد لقيت زيد ,, لا ويروح ويجي ويرجع على خويه ويلعب هو وياه ويشرشح ذا ويلعب ف حسبة ذا وياذا اني جايب راس غليص . اللي ابغى اصل له بعض الناس كأنه صياف والا مطلق مايتنازل الا يلعب مع شاعر معين حنا شبعنا من كثر مانقرا لهالاسمين الى درجة ان حنا عرفنا اسلوبهم وملينا لذا طغى الملل على هالقسم اللي كان في يوم من الايام شعلة نشاط ومرفى من مرافى المعرفة في المرقاب .

نرجع للزبدة :
ياجماعة فكوها شوي وريحونا من الشللية وياشعار المحاورة يـا ( كبار ) عطوا المبتدئين وجه
وريحووووووووووووووونا من الشللية القذرة

عدنا والعود احمد


خلوني شوي افضفض لكم عن شي يجول بخاطري حول ردود الاعضاء خصوصا اللي ماتسمن ولاتغني من جوع ..
بعض الاعضاء الكرام يجيك مدرمح راسه ويرد صح لسانك يالقرم و لاهنت .. لا بعد يحط لاهنت مرتين يعني تراني رديت والا الثاني يقول تقبل مروري واخونا الثالث يقول مررت من هنا وغيرهم يجيك لاهنت يابوفلان طبعا يعطيه اسم من راسه مع علمه باسم راعي الموضوع بس يحسسه اني مااعرفه ورديت عليك من باب الغلا لفلان اللي طبعا ماهو انت ياراعي الموضوع الاساسي ..
كل هالردود لاتخدم ابد اللهم انها تزيد عدد المشاركات اللي يطمح فيه الكثير تدرون ليش عشان ياخذ له نجمتين من الموقع وكأنه خذا منصب رئاسي ..

الزبدة ياجماعة ..
ترا العبرة ماهي في كثرة الردود العبرة في الكيف صدقوني يمكن يجي واحد ردوده مية تسوى ابو اللالاف
ياجماعة مرة اخرى ..
معـًا لنثري المواضيع بالردود وبلاشي نثري العداد بكثرة الردود اللي تفشل

وسلامو عليكو