.. آخـر البدو ,,

شاعرنا المبدع .. حاتم البراك

عليكم السلام ورحمة الله وبركاته
ويامرحبا مليون يا بو سلطان
ونوّرت مرقابك لاعدمتك

ما قرأته هنا .. يلجم اكثر المتذوقين طلاقة ويجعله في حيره من امره قبل ان يبدي اعجابه
قصيدة مدهشه .. مدهشه .. مدهشه

وفي فهمي للشعر هذه الدرّه من عيون الشعر

نعم انت من آخر البدو .. ومن أول المبدعين في عالم الشّعر المزحوم بالاصوات المختلفه
لم يكتب هذا الإبداع شاعر ( العام وامس ومقيله هو مقيله )
التجديد في نسج الافكار هنا مذهل بحق

ربط متماسك منذ بداية الاستهلال حتى آخر كلمة من القاف الاخير
ولفت انتباهي تطعيمك لهذا النسخ المبتكر بالمفردات الاصيله التي وافقت مراتع الريم

لله درك يا شاعرنا الفذ
ولا مجناب عن اللون المفضّل

ياريـم لاتجفليـن ويجفـل الصيـد
خلّيـه فـي مرتعـه والله وكيـلـه

الشيمـه اليعربـيـه والاجـاويـد
والوجـه وسلومنـا العليـا كفيلـه

من حين جينا بلا سابـق مواعيـد
ياريم وانتـي علـى مثـل المليلـه

ياريم واللي جبل طبعك على الكيـد
مالله جبلني علـى غيـر الفضيلـه

النفس ميرادهـا عـذب القراهيـد
والعين عـن غِـرّة الغافـل كليلـه

والرجل ماتدهـل الا شامـخ الحيـد
مع طامن القـاع خطوتهـا ثقيلـه

عذبتهـا فـي محاديـر ومسنايـد
مع كور سمحه ومع سرج الكحيلـه

من بطن بيشه ليا حـزم الجلاميـد
مارجـمٍ الا قـدم رجلـي عميـلـه

ياما فجعت الجـوازي رتّـع البيـد
بالمارتيـن القصيـره والطويـلـه

إليـا ارتكـى منكبـي لإم العباريـد
يحرم علـى القايـده تـلّ الجميلـه

انا آخـر البـدو يامنتوقـة الجيـد
انـا وريـث المواريـث الاصيلـه

انا صبّـيِ ولـد صبيـان توحيـد
اعـراب معرّبيـن أصـل وقبيلـه

اهل الشيم والقيـم وأهـل التقاليـد
وأهل المكـارم والاخـلاق النبيلـه

وش عاد لو يمتلي وجهي تجاعيـد
ماهـوب عيـبِ علـي ولا فشيلـه

عهدي بوقت الرخى يوم ارضع الديد
واليوم مالـي واردّ الشيـب حيلـه

اشملت واجنبـت مـرّات وتراديـد
ومثلي دفـوف البسيطـه ترتخيلـه

ياكثر مافـي مناكبهـا مـن الفيـد
للي يخـوض الـدروب المستحيلـه

لوم المعالي علـى خطـو الاواليـد
اللـي محاويشهـم منهـا قليـلـه

لو يصقلون الهمم صقـل البواليـد
ترضخ لهـم هامـة العليـا ذليلـه

لاعاش رخو العزوم موثّـق القيـد
غلق المحاريـف مذمـوم الفصيلـه

ما احفت سبوته عسيرات المواريـد
العام وامـس ومقيلـه هـو مقيلـه

لو يترك الناس فـي دنياهـم بعيـد
النـاس مايتركونـه فـي سبيـلـه

وعرض الفتى لاتعـرّض للمناقيـد
مثل الضريبه علـى متـن البتيلـه

مركـوزةٍ للنهيـلـي والبـواريـد
وبـوارديّ اللسـان اقـوى فتيلـه

ذهب صافي ،،
وصح لسانك مليون ،،

..