(( الحيّالة )) وصلوا .. !!

هههههههههههههههههههه
هههههههههههههههههههه

روعه يا ابو حمد

طيب هذي قصه ( فـْرِشْ ) يعني طازه حصلت قبل اسبوعين, على ذمة الراوي طبعاً اللي رواها لي..
راح اختصرها لكم على الآخر لأنها طويله شوي..

انتشر قبل اسبوعين ( إيميل ) يقول ان البنقاليّه يدائماً يقولون للسعودي ( يا مدير ) أو ( مدير كبير ) ..
و يقال ان معناها في لغة بنقلاديش أن كلمة ( مدير ) تعني ( حمار ) اجلكم الله ..

جاء واحد سعودي عند سوق الذهب و كان فيه دورية شرطه حراسه لأسواق الذهب واقفه في موقفها..
و جنب سوق الذهب فيه بوفيه.. السعودي طلب من راعي البوفيه و هو يدخن برّا..
جاء البنقلاديشي بالطلب و قال ( شكراً مدير ) .. قال السعودي ( عفواً يا هُمار ) .. المهم تهاوش هو
و الهندي.. رجل الأمن كان واقف برا دوريته و سمع الكلام و شاف الهوشه ..

حاول يصلح بينهم رفض البنقلاديشي الا يروح للشرطه.. أخذهم العسكري لمركز الشرطه..
عند الضابط قال المدعي ( البنقلاديشي ) ان السعودي قال له ( هُمار ) و ان العسكري يشهد
على ذلك.. قال الضابط للسعودي هل كلامه صحيح, قال نعم, قال ليه تقول له قال لأنه قال
لي ( مدير ), قال الضابط للعسكري هل تشهد على كلام البنقالي .. قال نعم.

المهم حولهم للشيخ في المحكمه, قال الشيخ للسعودي ليه تقول له ( حمار ) قال ما قلت له ( حمار )
قال في التحقيق انت اثبت ذلك و العسكري اثبت شهادته.. قال انا قلت ( هُمار ) و لم أقل ( حمار )
و العسكري يشهد على ذلك, و البنقالي قال لي ( مدير ) .

قال الشيخ طيب ( مدير ) ما فيها شي.. قال السعودي و ( هُمار ) ما فيها شي..
اذا تبي تحكم على المعنى فكلمة ( مدير ) عندهم يعني ( حمار ) و كلمة ( هُمار ) عندي يعني ( حمار )
وش من اللي بدأ بالغلط في البدايه..
و اذا تبي تحكم باللفظ فكلمة ( هُمار ) ما لها معنى ..

طلب الشيخ العسكري و قال وش تشهد به انت؟ قال اشهد ان السعودي قال ( هُمار ) قال يعني
تشهد مع السعودي؟ قال انا اشهد مع البنقالي بس انتم هالحين غيّرتوا معنى الكلمه ..
فأنا اشهد انه قال ( هُمار ) .. قال الشيخ اذاً شهادتك تنتقل من البنقالي الى السعودي ..
قال العسكري و الله مدري يا شيخ انت دبّرها بنفسك و بس..

قال الشيخ للبنقالي وش معنى ( مدير ) قال يعني ( مانجر ) يعني كلام كويّس ..
قال الشيخ للسعودي وش معنى ( هُمار ) اللي تقولها؟ قال يعني ( هُمار ) ..
قال الشيخ طيب علمنا وش معنى ( هُمار ) قال ما لها معنى هي كلمه كذا بس..

و انت يا شيخ تبي تحكم باللفظ و الا المعنى؟؟ انا الشاهد العسكري صار معي في كلمتي
اني ما اخطيت على البنقالي و لا قلت له ( حُمار ) ..

فقلب السعودي شهادة العسكري معه بدل ما تكون مع البنقالي..

في الأخير الشيخ قال اكتب يا كاتب .. انتهت المشكله بين الطرفين بالتراضي و التسامح..
حيث اتضح ان ( هُمار ) كلمه ليست مسبّه بل هي كلمه عامه .. و اتضح ان ( مُدير )
ليست مسبّه بل كلمه عامه..

يالله انت وياه كل واحد يمد يده على خويه و تسامحوا عندي ..
ابلشتوني ( هُمار ) و ( مدير ) ..




السالفه فيها اكشنات و اطول من كذا .. و ان شاء الله احكيها لكم اذا اجتمعنا ..
لكن حبيت اختصرها عشان ما تندبل كبودكم منها مثل ما اندبلت من قصة خالد السيحاني


تشاو

ش. س.