شطحات شاعر ...

[poem=font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
لازاد سوق الغثّ ياسوق السمين = لاتعلن افلاسك وانا عندك زبون

يمكن يعود الوقت وتدور السنين = واللي غدو هاك الزمان يعوّدون

وإن زعلك هرج الدلوخ الضايعين = اضحك بسن السخرية لوك مغبون

لا تفرح المسترزقه والشامتين = اللي على السذّج بغيرك يلعبون

تبغى تغيّر في النظام بكلمتين = وتسمم الاذواق وتغش العيون

لو شوّهوا صورتك بالفكر الهجين = بكره تخيب ابها الهقاوي والظنون

من جعجعتهم ما انطحن غير الطحين = اللي على الريحه يجون ويرجعون

ذولاك نقصٍ من حساب العالمين = ما كنهم بأحياء لو ما يٌذكرون

على البهارج من يسار ومن يمين = تضوي.. وتجذبها المغازف واللحون

وانا ما دامي عايش وجنبي متين = لأموّلك بالكاش واشتال الديون

إلين ما نقضي على المستشعرين = اللي دبلوا كبد الاناسي والجنون[/poem]

هذي ثلاثة ابيات بالفصحى شرفني بها الاستاذ ( فيصل بن محمد العصيمي ) وقد ارسلها عبر الجوال ويقول فيها :

[poem=font="Simplified Arabic,4,indigo,bold,normal" bkcolor="transparent" bkimage="" border="solid,4,burlywood" type=1 line=0 align=center use=ex num="0,black""]
إن يسألوني عنك أشعر أنني = قد زدت قدراً عندهم وجلالا
هذا لإن الحمد نحوك دائماً = يستبدل الإدبار بالإقبالا
لو كانت الخيلاء تحمد كنت من = إن سار حق له بأن يختالا[/poem]
ورديت عليه بقولي:

[poem=font="Simplified Arabic,4,sienna,bold,normal" bkcolor="transparent" bkimage="" border="solid,4,indigo" type=1 line=0 align=center use=ex num="0,black""]
ألبستني تاجً يليق بهامتي =فيه الحروف بزهوهن تلالا
إذ أنني من نبع علمك ناهل=صفواً من الأدب النقيّ زُلالا
إن يسألوا عنّي فأنت معلمي = لي فيك في كلِ الأمورِ مثالا[/poem]

هذه قصيدة موجهة إلى احد رموز الوفاء في هذا الزمان وهو الشيخ ( حمد بن غديف القحطاني ) .. سأل أحد الرجال عن حال صديق قديم قد رق حاله وانقطعت بينهم الاخبار وهو من طبعه الوفاء ، وعندما سأل رد الرجل كأي رد ( بخير ونعمة )،، وأنا في هذه القصيدة أوضح لأبو غديف الحال كما هي لعلّه ان يصله بجاهه او جوده ، وهو أهل لذالك.

[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
يابو غديف ان كان تنشد عن الحال=من باب كيف الحال ، عساك طيّب

رد الاجابه عن تساؤلك رجال=من باب اخذها بالوفاء من قريّب

وإن كانها من هاجس القلب للبال=ذكرى رفيقٍ بالوفاء ماتغيّب

علّمتك بما يمكن بحاله يقال=لو كان مافي سيرته ما يعيّب

أنته خويه من مدى عدة اجيال=يومه شباب وقبل راسه يشيّب

واليوم جاب ونعم وعياله عيال=مير الزمن فيهم ظنونه تخيّب

وإن كان طيب الرجل ينقاس بالمال=يفداك حال الرجل يابو الحبيّب

مافاد عرفه لااكثر الناس بريال=عقب انكر الاقصى وصد القريّب

وانته تزود من الوفاء عز واجلال=وبسيرتك روس النشاما تطيّب

مابرت في الأول ولا برت في التال=وبطيب راسك يفتخر كل طيّب

حلاّل عقداتٍ عصت كل حلال=ونجدة ضحايا التضحية والتسيّب

ريفٍ مريفٍ نايف و شامخ وعال=غيثٍ مغيثٍ وابل نصوب صيّب

حميت بيض اقوالك ببيض الافعال =لابستك الهيبه ولا انتب تهيّب

عددتك بطيبك وتعدديك محال=اصعب على القارئ من اللي يغيّب

وانا شرحت الوضع من واقع الحال=دام الحقيقة تنوخذ ما تسيّب[/poem]

ارسلت قصيدتين وحدة لي ووحدة لزميل .. في سمو أمير دولة قطر الشيخ حمد وفي الشعب القطري ودولة قطر .. للأخ والأعلامي سعد بن متلع .. وهو فازع جعله يسلم .. وأعطاها بحكم علاقاته في الأعلام إلى شخص وعده بأنها سوف تنشر في عدة مجلات محلية قطرية .. وبعد مدة اتصل سعد وقال لي انها نشرت حسب كلام صاحبه له .. وبعد البحث تأكد لي انها ما نشرت وأن صاحب سعد ما وفاء بوعده ..فقلت هذي الابيات موجهة لسعد بن متلع .. اقول :

[poem=font="Simplified Arabic,4,orangered,bold,normal" bkcolor="white" bkimage="" border="none,4,gray" type=2 line=0 align=center use=ex num="0,black""]
مادام لي في كل غاية وسيله = ألحق عليها غايتي واختصرها
باسم الشرف ماهيب باسم الفشيله = وتنومس اللي جابها وانتظرها
ذكرت وقفات الرجال الاصيله = شروى حميمٍ فزعته ما ذخرها
وانته يابو متلع حبالك طويله = تارد على غيض النفوس وقشرها
واصل ، ومتمكن ، وقرم ، ودليله = لاضاع قصاص الجرر في جررها
وقفتك معروفٍ على الراس اشيله= وافخر بها لو كان ما شفت اثرها
جتك القصايد بالبيوت الجزيله= وأحييتها لكنّ غيرك قبرها
أخاف يحسبها عليك بجميله = وهو في الحقيقة ياسعد .. ما نشرها[/poem]

[poem=font="Traditional Arabic,6,darkblue,bold,normal" bkcolor="burlywood" bkimage="" border="solid,4,chocolate" type=2 line=0 align=center use=ex num="0,black""]
حطيتني مابين وصلك وصدّك = واصبحت مع طول المدى خالي شعور
اما انت شفني من حنانك و ودّك = وإلا انت خل اللي مع القلب مستور [/poem]

[poem=font="Simplified Arabic,4,purple,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
إن كان لي يابوي في حظّي من الغيد الخيار=ما اخترت غير اللي جمال الكون بين يدينها
شاميّةٍ يوضي توهّجها وهي تحت الخمار=ما بيّنٍ منها الا اصابعها ومحجر عينها
من ضفّة الفيجه روت ثمّ اينعت فيها الثمار=واثقل غصونٍ ما تميّز خوخها من تينها
قدٍّ تلاويه الهبابيب من يمين ومن يسار= تقول به حاجه تبيها منه مدري وينها
فيها الخصائص مستقلّة والصفات بدون اطار=وأصعب من الوصف انك تصدّق مزايا زينها
جمرٍ توقّد فوق ثلج ، وليل في عزّ النهار=تلغي مسافات النقايض كل ما جت بينها
لاشافها اللي بنت عمّه عنده من اغلى المهار=يزهد بقيمتها ويلعن يومها وسنينها
زودٍ على هاك الجمال الطاغي تشوف الوقار=فيها وهي من بيت ناسٍ ما تدنّس دينها
واليا ازعلت منّي سعودية تطالب بأعتذار = قلت ابشري بالعذر لكن عقب ما تفدينها[/poem]

ارسل لي فيصل بن محمد هذه الابيات على الجوال يقول :

كل ماحاولت اغض الطرف عن فتانه
=شفت منها مايسمر في جسدها عيني

لامشت والجو دافي كنهـا بردانـه
=كل بارز يرتعش في جسمها يغوينـي

والنسيم ان كان خلاها شبه عريانـه
=لوبغيت اغض عنها الطرف مايمدينـي

ماتخالف دربي الشمحوطه الرويانـه
=الرداح الكاعـب الا يمهـا تلوينـي

تلوي رقبتي بدون اشعر ليا اخر خانه
=وتطرح المسباح والمسباح بين يدينـي

والغريب ان العزيز المعتلي سبحانـه
=عن بنات ادم وحوا كلهـن مغنينـي

بس انا كني (حسن) لاشاف له فتانه
=المرض يا (صالح بن هريس) فيه وفيني

وكان يقصد بحسن ـ حسن بن معروف ..
فرد عليه حسن يقول:

الهـواوي مايتعـب فالهـوى شيطانـه
=مايروح بعيـد مثـل العالـم الثانينـي

كل ماعرض على عود يهـز اغصانـه
=ينهصر للريح.. مطغيه النـدى واللينـي

شده الهاجس وفكر فـي طعـم رمانـه
=ولد عينـه للـورود اليانعـه والتينـي

وتاه في حسن الخطوط الهاديه .. في الوانه
=وغاب مع فوحة زهور الاس واليسمينـي

مير يذكر حاجتين .. تشد حبل عنانـه
=وتكبح جماحه عن الخمسيـن والثنتينـي

واحده منهن .. مايطري له يقود خيانـه
=مايدانـي ينتهـز خلـق الله المقفيـنـي

و واحده منهن .. يدين لخالقـه بديانـه
=تمنعه لجل الهوى .. يطمر حدود الدينـي

وكان ردي التالي :: أقول

القلوب الخضر من جور الهوى تعبانه
=قلتها وانا الهوى فـي قلبـي معنينـي

المعنى لو جحد ما واجهـه بلسانـه
=بان فيه من المواري مايبكـي عينـي

ذايق وصل الهوى من قبله وحرمانـه
=وضاع في دربه ثمر قلبي ونص سنيني

ماعرفت الحب غير بلوعته واحزانـه
=ولاعرفت الغيد غير بطبعهن الشينـي

مالقيت من البنات اللي تقول انسانه
=طبعهن واحد .. ولعبتهن على الحبليني

لو بدت لك واحدتهن حلوه و ولهانه
=لاتومنها على قلبـك تبيعـه دينـي

واهني اللي كبح عنهن جماح حصانه
=ساليٍ باله يابومحمـد مـع السالينـي

[poem=font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
دوب هاجوس المشاعر ضبط جوّه = واستحثّه قاف غيره من ارقادة
شاعرٍ ياجعل ما تنطفي ضوّه = فوق ريمه ما تمايل به شداده
لاسماء بالحرف ما نزّل سموّه = يشعل شموعه ويستيسر فواده
بالغلاء نلتمّ ونجدد الخوّه = وانتجاوز فكرة الوصل وأبعاده
أعتلينا كل مرقاب بعلوّه = منتداً نفداه ونحب روّاده
ما تبعنا سالفة ليته ولوّه = لين جاء المرقاب في موقع ارياده
للإدارة شكر وأشيد وأنوّه = ولا يوفّي حقهم شكر و إشاده
[/poem]

أبيات موجهة إلى النائب الثاني وزير الداخلية نايف بن عبدالعزيز على لسان كل وفيّ تجرع مرارة الظلم والقهر في صروح العدل ومظنة الإنصاف في بلاد الحرمين الشريفين ، ويأبى إلا أن يبقى على ذلك العهد مع كثرة المغريات والتحديات والدواعي للتخلّي عنه ... ولسان حالة يقول .. لئن لم يكن على الأرض عدالة ،فعدالة السماء قادمة حتماً ... يقول...

[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياسيّدي نايف عليك الله وامانه والسلام = لو حاشت الثوره بلدنا مثل ما حاشت مصر
ذاك الولاء وإلا ترى هرج السعة يبقى كلام = من دونك نبيع الجسد وإلا نجيب الك النصر
هذا عهد جدّي وابو جدّي مع أبوك الإمام = بيعة وفاء ما كنّها مكتوبه إلا أمس العصر
ياكثر من يبغاني ارخصها وأفك إلها الخطام = وأبيعها بأحلامي اللي دونها شوفي قصر
كسر القلوب أصعب على الأجواد من كسر العظام = والحاجة تذل الرجال ودونها يعمى البصر
ياكبر عذر العين من همّي ويا بعد المنام = إن كان للمظلوم ساعة نصر ... متى ابا انتصر!
[/poem]

[poem=font="Simplified Arabic,4,purple,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياكثر شرهاتك ولو ما معك حق=تخطي ويدمح جرح زلّتك شوقي
لو كل زلّه منك في حقي بحق=والله لتبطي ما توفّي حقوقي
وإن كان منّي تزعلك كلمة الحق=معاد فيك اشقيت باقي طروقي
والله والرحمن والحيّ والحق=لشيلك من أحلامي ومن عروقي[/poem]

[poem=font="Simplified Arabic,4,indigo,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
ياسموّ الأميره ما لغيرك سموّ = لو على الصدر ماس ولو على الراس تاج
لك من الشمس نور ، ودفئ حسّ وعلوّ= وفي جبينك قمر ، وبوجنتيك امتزاج
بين خوخ وكرز ،، يعني حلو مع حلو = وأنتي احلى ،، وثغرك فيه خمر المزاج
هزّي خطاك وامشي بإفتخار وزهوّ = ما علينا ملام .. ولا عليك احتجاج
[/poem]

[poem=font="Simplified Arabic,4,firebrick,bold,normal" bkcolor="burlywood" bkimage="" border="none,4,gray" type=0 line=0 align=center use=ex num="0,black""]
أنا وحيد ،، و وحدتي راس مالي = مرتاح بالي من عناء الوقت والناس
الحظّ خلاّني وحيدٍ لحالي = يبغى يعنيني،، وعشت اجمل احساس
[/poem]

[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يارب لطفك لا يجي يوم وانهج=الأرض جرداء والصبايا جياكر
نمسي على عجه ونصبح على عج=وهمومنا تزداد والوقت ماكر
وأخلاق اهلنا زفت واسلوبهم فج=لو انهم ما يقربون المناكر
لكنّهم خلّوا ذراريهم اتدج=وعيّت تأدبها الشرط والعساكر
في كل شارع هجوله،طهبله،رج=وشلّة دشيرٍ بالمواتر تجاكر
اليا بغينا نطرب البال وانسج=لازم نصفّط في الجواز التذاكر
كانت تصبرنا من الحج للحج=وباقي السنة بالذكريات انتذاكر
واليوم حادي الهجرة يصيح ويلج=وإن كان ما صبرتني سرت باكر
[/poem]

[poem=font="Simplified Arabic,4,sienna,bold,normal" bkcolor="white" bkimage="" border="none,4,gray" type=2 line=0 align=center use=ex num="0,black""]
القوافي تستوي لي واتساوى معها = كنّها ما تعرف إلا هاجسي وحروفي
نبض قلبي مفردات الشعر يوم اجمعها = من بساتين الفؤاد ومن حصاد كفوفي
ما سبقني يمّها الشعار في مطلعها = ولا يضيق الافق باحساسي عن اقصى شوفي
مرضيٍ نفسي ولو ما شيٍّ بيقنعها = ولا اضطررت اطلع بها عن حاجز المألوفي
غايتي منها بعيد و رغبتي .. باشبعها = دام ما تلحق مناقيد الرجال شفوفي
تحفةٍ تسمو بي بملكي لها وارفعها = قبل لا يدوي صداها في زوايا جوفي
لو ثمنها بالدراهم ما قدرت ادفعها = والثمن في مثلها عند العرب مخلوفي
سقتها وانا على وقفاتي مطبّعها = ما تحيد وحادي افكاري بها مكلوفي
لين تارد هقوتي فيها وانا مبدعها = في مدايح راعي الوقفات والمعروفي
[/poem]

[poem=font="Simplified Arabic,5,firebrick,bold,normal" bkcolor="silver" bkimage="" border="none,4,gray" type=2 line=0 align=center use=ex num="0,black""]
وجدي على شوفك مثل وجد صدام = عقب مسكوه جنود بوش الملاعين
دارت على راسه دواليب الايام = واضحى كسير المال والجاه والعين
عزيز قومٍ ذلّه الوقت وانضام = ياثقل حزّات انقلاب الموازين
[/poem]