(......... كنوز مرصوده ........)

بعد التحيه وفائق الإحترام:
هذه القصيده تشرفت بإلقائها في زواج أبناء العم محمد بن عارف وحمدي بن عارف بن مطرقبل مده.
أحببت ثوثيقها في هذا المتصفح الذي لايزداد بزيارة مرتاديه إلا سمواً ورفعه.
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
بسم من نزّل على عبده كتابه سوره سوره=الحكيم القادر المالك عظيم الشاني
أبتدي به قبل مأبد بالشعر وبحوره=قاسم آجال العباد المعطي المناني
ياعسى نفسي على مايفرضه مفطوره=والكلام الطيّب الزاكي حصيدلساني
ماتجيك النفس منهيه تجي مأموره=وكلها بأمر الولي لا أول ولاثاني
والمقام اللي يشرف والشرف بحضوره=يبهج الصدر الحزين وينعش العمساني
مرحبا...عد الربيع اللي تشع زهوره=مبتداها المسك واليشموم والريحاني
ماهقيت النفس في ماجوبها معذوره=دامت إن المد وافي والصدر شفقاني
ياهلا يامرحبا فالحله المعموره=بالعلوم الوافيات ومذهب الجداني
عند ربعٍ فالزمان فعولهم مشهوره=في المواقف تخلص الطلاب والدياني
منهم وفيهم جذور الطيب قبل بذوره=ماخذوها من فلان ومن عيال فلاني
وهبة اللي بالرواسي ثبّت المعموره=وإبتدع من فوقا سبعٍ بلا عمداني
إن تطاروا فالكرم كلٍ حسب مقدوره=الدلال بهيلهنه والصحن ملياني
عاشت نفوسٍ على بذل العطا مفطوره=مادخلها شك في قاص العرب والداني
ريف مكتوف النصيب إمّا أسعفن أوموره=لاجفوه القوم والأصحاب والخلاني
روس قومٍ كل طايل معتلين وكوره=كلهم حسبة يمينك عدهم من داني
يعلم الله لولا ذكر الكلمه المأثوره=والهروج العوج والمزهاف والعجلاني
قلت تيجان المراجل بينهم محصوره=ذخر رجالٍ يعدي طايل الأيماني
يوم بعض الناس حي وسمعته مقبوره=باردٍ ناعه ومنباعه وحيله واني
صامدٍ قدم الزمن كنه زعيم الثوره=بإسم خيرالله ينادونه مع العرباني
مشبعٍ سبع الخلا وطيور شلوى سوره=ناصر المظلوم ومعين الخوي والعاني
مع طحاطيحٍ تفر الخصم مثل الكوره=ديدن الفريّس والأبطال والشجعاني
من يخالف عن هواهم ماتطير طيوره=بين رمشه وإلتفاته دونه خسراني
وإن ذكرت الجد الأول وإن ذكرت عصوره=ترجف قلوب الرجال وتذهل الأذهاني
وإن بغيت العدل حتى إنك تجي فالصوره=مانقول الحجه اللي مالها برهاني
حيهم وأكرم بهم من عزوةٍ مخبوره=بيّدوا صنع الفرنج وصنعة النصراني
من عطوه سهوم بقعا ماتطول شبوره=ماكسب غير النكد والويل والخذلاني
يشهد التاريخ لصقور الوغى ونموره=ويقنع الجيل الجديد ويقنع الشيباني
وإن شهد ظلعٍ طويلٍ ماتون سبوره=تشهد جبال الحجاز وتشهد الشعباني
مادرج دم الخصيم ولادفق شختوره=من طرف رعديد والاّ طلقة عليماني
من عسامه شابوا اللي فالمهاد بزوره=من عسام النار والبارود والدخاني
ودارت الأيام ياكاف المصايب دوره=وإستدار الحال شمل وقرّت الأعياني
الزمان يدور وأيامه تعد شهوره=والعرب سردادهم مرداد فالميداني
والجمل لا زاد حمله دق الأرض بزوره=وإستوى للسارق المزاح والقوماني
دم الأخصام يتقطّع كنه النافوره=من تحت حد الحدب بسم الله الرحماني
لين طيّرنا العماس عن الجبل وصخوره=وإستتب الأمن لهل الخاطر الزعلاني
وإستوينا عدل والغازي طفى دافوره=لاعطىً يذكر ولابالسعر والاثماني
بالمشوّك والصوك والعزوه المذكوره=والرماح العلط والسيف الخظيب الحاني
ماتركنا من مقاصدنا ولامذروره=غير شيٍ ما يجي بالعقل والحسباني
ومن يبي حلو الزمان ولايذوق مروره=ماقضى له نوب لاريض ولاعجلاني
قلتها وكلٍ يصوغ الشعر حسب شعوره=والقبايل كلبوهم والنعم من داني
كل دارٍ تحتميه ذيابتة وصقوره=وكل قوم إلهم على حمول الشقاء بليهاني
ولو أبا أعد الخفايا وأبهل المصروره=وأسرد اللي في ضميري وأستغل أوزاني
إنقضى ليل السعد والصبح شعشع نوره=ماختلف نبعي ولاشعري ولا وجداني
أنتقي جزل الكلام ولا أتقرّب زوره=وأحسب حساب الزلل والزود والنقصاني
والغلط مرجوع والهرج الصواب إسطوره=وأطلب الهادي على دروب السنع يهداني
والفضل للعزوه اللي يعتزون بنوره=من بعد فضل الكريم المعطي المناني[/poem]
مطلق بن عبيان.