ثلاث نصائح أولها : (( لاتنام في بطني وادي )) !

( أنقلها بتصرّف )

الله يمسيكم بالخير يالربع


هذي سالفه حصلت من قديم ايام القل والشفاقه في نجد خبركم منول الجيد من الناس اللي يدرك غداه ومثل ما يقول المثل ( غداه يطرد عشاه ) يعني ان حصل الغدا ما حصل العشا
وسالفتنا عن شاب عاش في منطقة نجد هو وامه وزوجته في بيت واحد ، وكان توه معرس ولا جاه عيال ، وكانت حالتهم صعبه فقر مدقع ، وفاقه متعديه الوصف ، والولد كان فيه جديه وصادق في تعامله وراعي نخوه وشهامه

وفي يوم من الايام قرر الولد ان يبحث له عن مصدر دخل ، يقدر يصرف منه على امه وزوجته ، وقال لوالدته انا بسافر كود الله يفرجها علينا بروح اترزق يمن وشمال لعل الله يرزقني ... وامه رغم تعلقها به الا انها صابره ومحتسبه .. وقالت لولدها الله يوفقك وين ما تروح .. دربك اخضر ، الولد تجهز وزهب ناقته وعليها زهابه ومن بعد الفجر وهو ساري ويمته لم الشمال ..

وصار يمر على هالديار ..ويتحرى الرزق ..ولا مع رحمة الله ياس ..واخيرا وهو في احد الطرق خارج من احدى القرى قابل له راعي حلال ...وتعرف عليه بالصدفه ..ولاحظ ان حلال هالرجال كثير ومتنوع من ابل وغنم وربي مبارك له فيه ..وهالولد تخاوى مع راعي الحلال في الطريق وصار بينهم نوع من الالفه والموده ...وفي يوم من الايام قال راعي الحلال للولد ..وش رايك تشتغل عندي في رعي الحلال ...وبعطيك كل عن كل سنه عشر نياق عشر وعشر من الغنم دفع ..وافق الولد بدون تردد...وصار يشتغل مع صاحبه في رعي الحلال ..

ومرت السننين ..وصار له عند هالرجال حوالي خمسطعش سنه وهو وياه على قلب واحد ..وفي يوم من الايام الولد فاتح راعي الحلال وقال له ابي ارجع لم اهلي ...وابيك تفرق حلالي من حلالك ...قال له راعي الحلال ابشر بسعدك ...وفرق له حلاله ..اللي صار باعداد كبيره جدا ...ومن باتسر الولد ودع خويه ومشى مع حلاله راجع لم ديرته ...وساتاجر له رعيان يساعدونه في سوق الحلال حتى يوصل لديرته ...

وبعد تقريبا مسيرة ثلاثة ايام ..وهو في الطريق قابله خيال حكيم على فرسه وسلم عليه..وقا الخيال له ...مشاء الله عليك اشوف معك حلال راهي ....وش رايك ابيعك ثلاث نصايح ثمينه جدا ..كل نصيحه بثلث حلالك ...استغرب الولد وفكر ...وقال في نفسه كل هالحلال رزق من ربي ..وان كان انه من نصيبي ورزق لي فلانيب خاسره ابد باذن الله ...قال الولد للخيال موافق هات النصايح قاله الخيال :

النصيحه الاولي (( لاتنام في بطني وادي ))
النصيحه الثانيه (( لا تخاوي من لا تعرف سريرته ))
النصيحه الثالثه (( لا تلفي على اهلك من السفر بالليل ))

استغرب الولد من هالنصايح وشاف انها عاديه ولا فيها شي يمكن يكون جديد او جدير بكامل حلاله ...قال انا نيتي طيبه وصادقه وربي بيرزقني على قد نيتي .....لكم خذ الحلال وانا شريت النصيحه ..وسار في طريقه على بعيره مسافه طويله واثناء الطريق قابل له قافله متجهه في نفس مساره..وورافقهم في سفرهم ..وصار معهم على الحلوه والمره ...وفي احد الليالي نوخوا بيبيتون ...وجا هالولد بيفرش له مرقد ..ويتلمس الارض الا اثرها بطحاء ..قال في نفسه اييييه اكيد هذا وادي وتذكر النصيحه ...وهو اللي يقوم ويطوي مرقده وياخذ بعيره ويتشطر في مكان مرتفع عن الوادي ..قالوا له ربعه تعال معنا وراك ابعدت ؟؟ قال لا انا احب المكان المرتفع ابي البراد واخاف من السيل ..قالوا له ماهنا سيل ولاهنا مطر تعل معنا لكنه رفض ...ونام الرجال ..وعلى طلعت الشمس صحا من النوم ..ويتلفت يمين ويسار يدور ربعه في الوادي ..ماشف احد ...استغرب ونزل للوادي ..والا والله هذي اثار السيل واثره شالهم وحلالهم ..قال ايه صدقت النصيحه الاولي عز الله انه مالها ثمن رخيصه باللي هي به ...مشى مع الوادي وبدا يتفقد ربعه وكل ما مر شجره الا ويلقا له اما بعير ميت ولا ادمي غرق من السيل ..وصار يمسي ويجمع في بعض الحلال اللي تفرق ...وجمع له مجموعه من البعارين ...وفي مكان مرتفع من الوادي لقا واحد من اصحاب الحلال ناسفه السيل ..وساعده الولد وعالجه الين ردت فيه الروح ..وتخاوا هو وياه وقال هالرجال بنتقاسم الحلال انا وياك مثل منت شايف انقذتني من الموت وربعي شالهم السيل وماتوا ...قال الولد على خير ان شاء الله ..

وصاروا يمشون ..ويجمعون في هلالحلال اللي تفرق ...الين صار معهم قطيع كبير ..وبعد فتره الولد ماش حس من تصرفات خويه انها مريبه وانه يضمر له شي ...وفي احد اللياللي ..نوخوا بحلالهم وناموا ..ولولد كان خايف من خويه ..قام بعد ما نام خويه ..وانسل من فراشه وحط فيه خشبه وغطاها ..وتشطر عنه وصار يترقب الوضع وفي منتصف الليل شاف هالرجال قايم ويمشي على ا طراف اصابعه ومعه حصاة كبيره ويهوي بها على فراش الولد وتصير في الخشبه ..واثر الولد متزهب ببندقه وهو اللي يعطيه اياه والاه ذابحه ...قا الولد صدقت النصيح الثانيه ...فعلا لاتخاوي من لا تعرف سريرته ..

وبعدها واصل مسيره يم اهله ..ويلفي على قريته في اول الليل ..ولما وصل لبيته شاف امه سلم عليها وهي طبعا ما تعرفه لانه غاب عنها فتره طويله قرابت خمسطعش سنه ورحبت به هلا بالضيف وجلسته في راس البيت ...ولمح في الشق زوجته وهي نايمه وحنبها رجال نايم ..وهو اللي يلقط بندقه ...ويتذكر النصيحه الثالثه اللي هي (( لا تلفي على اهللك بالليل )) قال اعوذ بالله من ابليس ...ثم التفت صوت لامه وهي ما تعرفه وقال انا بلفي لي على ربع قريبين من هنا واجيكمم باذن الله باتسر اللغدا ..قالت حياك الله يا ضيفنا ..وطلع من عندها ..ومن باتسر الضحى وهو يلفي عليهم ..وجي لم امه ويسلم عليها ويعرفها بنفسه ...وقال لامه من هالرجال اللي عندكم ...قالت هذا ولدك ..قال ايييه هذي النصيح الثالثه عزالله انها رخيصه باللي هي به ... اعوذ بالله من ابليس بغيت البارح اذبحه احسبه رجال غريب


ودمتم مرقابييييين

قصة جميله وفوائدها كثيره


شكرا يا سعود

بارك الله فيك عزالله انك ما تجيب الا كل غالي وثمين لا عدمناك
قصة فيها من العبر الكثير الله لا يبلانا ويبعد عنا كل شر


كل التقدير لك اخيك


العجمـ بــدر ـي...@@

يسلموا ياسعود

قصه مفيده

يبي لها طباعه

تحيتي