هنــا اختصـار للواقع ( سعد الحريص )

.....!!! برد المكاتيب!!!.....

هبت جنوب وطاح برد المكاتيب
..................ويا كثر ما هب الجنوب وذكرته

يملا حضوره من حضوري وانا اغيب
..................وياما غيابي في غيابه حضرته

انا جا مطر صارت له اضلوعي اشعيب
..................وان راح ريح(ن) طير اللي بذرته

طال السكوت ومال صمتي مطاليب
..................غير الكلام اللي وقف وانتظرته

جنبت لو مالي عن الدمع تجنيب
..................من وين ما صديت فيني شعرته

واصمتي اللي صار فعيونهم عيب
..................واجرحي اللي لو فضحني سترته

لي صاحب(ن) يملا كفوفه تراحيب
..................لولا الحيا من ضحكته ما اعتبرته

يا صاحبي ماهي عليا مقاضيب
..................عذروبي انك ذخري اللي ذخرته

عذروبك انك شوهتك الاكاذيب
..................عذروبك انك جاك طيب ونكرته

ان جيتني بفراق زود العذاريب
................ لاجيك انا من زود صبر صبرتــه

للطير جنحان وريش ومخاليب
..................لكن يضيع صيدته في غبرته

ومن جزم نفسي يوم صار الردى طيب
..................حلمي قبل لا يكسرونه كسرته

ومن راح مني قـلت يا عله مصيب
..................دورت له عذر(ن) كريم وعذرته

للي يبي بعدي انا ماني قريب
............... اما ربحني ولاانا مـاخسـرتـه


قلبي خويي مالقلبي معازيب
..................واللي حقرني من رداه احتقرته

رغم الجروح اللي بقلبي معاطيب
............ حبيت كفين الزمــان وشكــرته


****

.....!!! حادي العيس !!!.....

البارحه غنيت ياحــــــــــادي العيــس
................. واليوم صمتك عن عيوني حــــداني

اليوم تلعب بـــــــــــي رياح الهواجيس
................. ولادري عشانك ضيقتي أو عشاني

مابين لوعات الجفا والوســــــــــاويس
................. البرد ساكن فـ ارتعاش المـــــحاني

وانا حبيس الصمت سجن الاحاسيس
................. ضاق الزمان ولا وسعنـــــي مكاني

والنور طعمه في عيون المحـــابـــيس
................. مرٍ مثل طعم الكلام بلـــســــــاني

متى بشعري يزهرنّ الكراريـــــــــــس
................. ومتى بقلبي يمطــــرن الأغــــاني

بيت الشعر ماهو كلام بــــقراطيــــس
................. ليت القصايد بالدفاتر مبـــــــــــــــــاني

والله ليفرق شعر من يرجي الكيــــس
................. عن شعر من ينحت صخور المعاني

ويبان فرقي باختلاف المقايــــــيــــس
................. حتى تحس بصدق وش كثر اعاني

والا الأماني راس مال المفاليـــــــــس
................. عزي لمن كانت جداه الأمـــــــاني

****
.....!!! تعالى نهيم !!!.....

تعالى نهيم
فى دنيا المطر والغيم
ولكنك000
تخافين00وتخافين00وتخافين
وعندك شي تخفينه00
وأنا أحب المطر .. وأنتى تخافينه
ولا أدرى سبب خوفك؟
ولا ظنك بعد000تدرين!!
تخافين المطر00
لا يبلل ثيابك
تخافين الرعد00
لا يرعب أحبابك
تخافين أن لمع البرق000
فـ عيونك يبان ما تخفين.
ابركض فالمطر00وابتل
وأذا أرعبك المطر ليله000
أنا أرعبنى الجفاف سنين00!!
****

.....!!! كل الدروب !!!.....

هذا الكلام جروح واوجاع واشواك
............... كنّي على طول السكوت مغصوبي

ازعلت ذولا..لجل يرضون ذولاك
.............. لا مرضيٍ نفسي ولاهم رضوبي

تعبت اقلب في يديني هداياك
.............. وتعبت اشاور توبتي في ذنوبي

لولا الزمن لولا الليالي ولولاك
.............. ماصار طيبي دوب حبك ودوبي

هب الهوى يمك وبانت خفاياك
.............. ولاعاد لك قلب يميل للهبوبي

اول عيوبك في عيوني مزاياك
.............. واليوم ميزاتي بعينك عيوبي

وكانك تشوح اليوم منا ومناك
.............. والله لا ارجع كل الانظار صوبي

وان قلت انا بنساك ياسرع مانساك
.............. من قبل ينشف عطرك اللي بثوبي

الشمس باكر فيك وإلا بلياك
.............. ماهيب لاموتي ولاهي غروبي

وإذا انقطع درب يجيبني بذكراك
.............. كل الدروب اللي تودي دروبي
****

.....!!! اكثرية !!!.....

ضاقت الارض واشتد الزمان
.............. راح وقت الهموم الشاعرية

من فقدتك واناماني بأمان
.............. والقصايد ماعادت منبرية

كنت اجيلك وكان الشعر كان
.............. ورد روحي وقلبي مزهرية

اكثري حب واكثرك الحنان
.............. وش كثر كانت الدنيا طرية

من حنانك يضيق بنا المكان
.............. وين ما اروح القاك اكثرية

****

.....!!! العبارة !!!.....

مريت فينا ليلة مالها وصف
.............. في وصفها ضاقت علي العبارة

رحبه جميله ناعمه جوها ترف
.............. مثلك حبيبي واسعدتني الزياره

فعيونك التحنان وفقلبك العطف
.............. رغم السنين وفي سلامك حراره

نظرتك حب وبسمتك كلها لطف
.............. يلوق لك ثوب البها والطهاره

من جرحك الأول إلى جرحك الألف
.............. قصيدتي بين الألم والمراره

واللي كتب فرقاك ما جاز لي حرف
.............. عقبك ولا قلت افدحي يا خساره

اقول في نفسي ورجلي على جرف
.............. إما عمار القلب والا دماره

لا طاب لك جرح ولا منقطع نزف
.............. والوقت مر وحان رفع الستاره

****

.....!!! برد الخوف والمستحيل !!!.....

غابت الشمس وإلا الحزن له مغربه
..................... وين أبغرب وأنا حزني غروبه ثقيل

مجدبه ياجروحي والسماء معشبه
..................... ساكنه والهوى ميل جريد النخيل

بارده ياحروفي والدفاء موهبه
..................... بارده مثل برد الخوف والمستحيل

صوتٍ أبعيد في قلبي ياليت أقربه
..................... وبين قلبي ومابيني طريقٍ طويل

ليت حزني مثل حزن البشر وأكتبه
..................... وليت دمعي مثل دمع العيون ويسيل

أشهد أني ردي حظ وردي تجربه
..................... وأشهد أني على بعض المشاعر بخيل

أيه مذنب في هالدنيا وهي مذنبه
..................... من دفا حلمي الطيب لبرد الرحيل

عذري اللي متعبنّي وأنا متعبه
..................... مال قلبي على بعض الهقاوي دليل

كل طيرٍ له اللي بالسماء يجذبه
..................... وكل غصنٍ تجوز له الهبايب يميل

صرت أقول الكلام المر وأستعذبه
..................... صرت أخاف الدفاء لوني وحيدٍ نحيل

كم صبرت وليال الصبر مستغربه
..................... لين قلة حلاة الصبر لو هو جميل

الزمن صعب والنسيان يامصعبه
..................... والدفاتر نشيّلها الهموم وتشيل

****

.....!!! يا حادي الركب !!!.....

يا حادي الركب لا تنطح هجير الشموس
........... و أحجب ظما البيد عن ماها و عن عيسها

كل ٍ على قد فهمه و الليالي دروس
...........و هل الحجا تفهم الدنيا و تدريسها

و الشجره اللي علت في جذعها نخر سوس
..............لو تصبر الريح عنها كان ما جيسها

ابقطع الصمت في صوت ٍ كما حد موس
...........و أقرع طبول الوفا و أضرب مراويسها

ما كانت الحرب إلا حرب روم و مجوس
...........و إلا أرضها يعربيها في تضاريسها

في قدومها تفتن الأنظار مثل العروس
...........و عجوز شمطى إذا أقفت في هداريسها

ليا قبست قل طالبها و طاب الجلوس
..............لو قلت يا كثرهم فينا معاريسها

ماهي بداحس و غبراهم و حرب البسوس
................جحافل الروم تزمي في كراديسها

أقول وجه الزمن باكر علينا عبوس
...........والله يكذب فزع نفسي و أحاسيسها

****

.....!!! رميت الورد !!!.....

(رميت الورد .. طفيت الشمع)

مضى عامين
مامر بكلامي دمع
ولا مريتي بعيوني
يا انتي
اي حزن اللي تركتي لي
واي احساس
ياكل الارض
في قلبي .. وكل الناس
وش اللي فيك ماينحب
وش اللي ينكره وركه
تغيب الشمس وتشرق شمس
وبكره لو يجي بكره يصبح امس
مثل ماكان في يوم من ايامنا بكره
وترا اللي حب مايكره
اقول اسمك وينبت للمعاني قلب
وتحضرني اغاني حب
وقول الدنيا لسى بخير
اساميهم تجي وتروح
واسمك مايفارقني
يجي مثل البحر
ويروح مثل الروح
انا ماخترتك احاسيسي
والا خترتي تحبيني
يقلون المشاعر
في سماها طيور
وانا اقول القلوب اشجار
ومن متي كان الشجر يختار
رميت الورد طفيت الشمع
مضي عامين مامر بكلامي دمع

****

.....!!! العذر مكتوب !!!.....

العذر مكتوب لاصـار الخطـاء مقـري
.............. آسف على ضحكتي وآسف على احزاني

خطـاي معـذور والا غلطتـي عـذري
.............. و مرارة العذر فـي قلبـي وفـي لسانـي

مدري وش اللي ذكرت وضاق به صدري
.............. مـدري وش اللـي نسيـت ولاتنسانـي

لبست انا ثـوب لاطولـي ولا قصـري
.............. ياطيبـه القلـب ويـن القلـب ودانــي

سنتين من عمرها مـرت ومـن عمـري
.............. سنتيـن احـس الزمـن فيهـا تعـدانـي

سنتين مرت حياتـي مـن ورا ظهـري
.............. والحب سجنـي ومسجونـي وسجانـي

والشعر مطرود من قلبي ومـن فكـري
.............. سنتين ماني ب انـا مانـي باحـد ثانـي

غنيـت للنـاس والدنيـاء علـى خبـري
.............. والشعر في دفتـري مغـرور وانسانـي

غنيـت للحـب يـوم عيونهـا تـغـري
.............. يوم الوفـاء والكـلام الطيـب الحانـي

غنيـت للدمـع يوم(ن) البكـى كـبـري
.............. واليوم انا اكبر من دموعـي وحرمانـي

اليوم ماعاد يمـدي اللـي جـرح يبـري
.............. مليـت كثـرت خطاياهـم وغفـرانـي

مليت انا الشعر مل الشعر مـن شعـري
.............. مليت انا الحـب مـل الحـب وجدانـي

و لو هي عليه عزيز النفس مـن صغـري
.............. ماشاور القلـب فـي كرهـي لعدوانـي

ان رحت ياكثرهـم وان جيـت ياكثـري
.............. ضاقت بي عيونهم لـو كنـت وحدانـي

تعبت وازريـت مامليـت مـن صبـري
.............. ليـت الـذي راح منـي كثـر ماجانـي

احيان ودي اطيـح مـن التعـب وازري
.............. و تشيلنـي عـزتـي وسـلـوم جـدانـي

****

.....!!! ديار المسلمين !!!.....

أنفض كلامك عن غبـاره
............. صمتك فقلبك لـه رنيـن

قلبك ماكـان إلا مغـاره
............. ترسم بها جـرحٍ حزيـن

رسمٍ نقشته فـي حجـاره
............. يشبـه رسـوم الأوليـن

ياوجهٍ أخجل من وقـاره
............. حلو النبا سمـح الجبيـن

ربح الزمن هذا خسـاره
............. والخافيـه باكـر تبـيـن

طاحة فأمريكـا عمـاره
............. هـزت ديـار المسلميـن

منها بدت حرب الحضاره
............. حـربٍ تـروع الآمنيـن

ماتاسع الجـرح العبـاره
............. ويضيق فالصـدر الآنيـن

أصعب من الموت أنتظاره
............. والأصعب العيش المهيـن

,,,,,,,,,,,,,,,,,,,


صحيح أحبك وأنت والله تنحب
............. لكن هذاك احرق فؤادي وأذابه
وش غيّر الدنيا وهي جدّها لعب
.............. وبدّل بشمس الضحك ليل الكآبه ؟
لا اقبل عليّ بضحكةٍ تسرق اللب
............. .. فتحت له قلبي وشرّعت بابه
مشي السحابه لا تريّث ولا خب .
.............. سبحان من خلّى النقيض يتشابه
لا والذي غيره حشا ما لنا رب ..
............. كنها مشى والأرض تحته سحابه
لو ما تثنــّى ما دريت الهوى هب ..
................. ترفٍ يميّله الغنج والذرابه
تفاح فتنه في محيّاه وعنب .
............. أجوع له واضما ضماه وشرابه
لي عضّ عنّابه وجمر الغضى شبّ
.............. في شفّته قلب البعيد اكتوى به
عين اشقرٍ ما طار صيده ولا طب .
............. ضاقت عليه من الرعاب الرحابه
حرٍ يذبّ الصيد من مخلبه ذب
............... في نظرته عز وجمال ومهابه
إليا شلع كنّه حجر والسما جب
................. يهوي بها كن الصعود انجذابه
والليل كنّ الليل في شعر يصبّ
............... شلال من فوق المتون انسكابه
والكلمه اللي بالهوى ما لها طب
................ لا انت بسما حبه ولا في ترابه

..............................

أوقد الحرب قل يا نار شبي
.........موت عز(ن) ولا ذل النجاة
ديرتي ديرتي والدرب دربي
........ما حسبنا لها موت وحيـاة


منقـــــــــــــــول

انا جا مطر صارت له اضلوعي اشعيب
..................وان راح ريح(ن) طير اللي بذرته

طال السكوت ومال صمتي مطاليب
..................غير الكلام اللي وقف وانتظرته


اختيار رايق لكل القصايد
لا عدمناك يا سلطان
المودة والأحترام

اخوك / متعب

مبدع هو سعد الحريص

الكلمات لا تصف ابداعه

الصمت أمام جماله هو أفضل تعبير

،،

شكراًَ لك من القلب يا سلطان

تحياتي

عز الله ان سعد الحريص شاعر مبدع ومبدع ومبدع


لاهنت يا بو السلاطين ،



...

لاهنت يالذيب

ازعلت ذولا..لجل يرضون ذولاك
.............. لا مرضيٍ نفسي ولاهم رضوبي


لاهنت ياسلطان


اختيار اكثر من رائع لشاعر مبدع ومتالق


تحياتي لك

لاهنت ياسلطان على هذا النقل الرائع الذى يدل على ذائقتك الشعرية الراقية فى الاختيار المتميز,,,وانصافك لشاعر مثل سعد الحريص يدل على صفا ونقاء معدنك ,,,ولك منى كل الشكر والتقدير

سلطان الاسيمر


اشهد بالله انك اخترت شاعر يستحق الاختيار والافضليّه .. الحريص في غنى عن التعريف والشهادات



كل الشكر لك يا سلطان

سلطان وافي
ومواضيعك وافية والشاعر سعد الحريص شاعر مبدع والله يوفقه ويوفقك

لاهنت
لاهنت

اي بالله مبدع مبدع ياسلطان


لاهنت لاهنت

بيض الله وجهك يا سلطان


عزالله .. ( سعد الحريص ) شاعر ومبدع حقيقي وقصيده فوق الوصف




سلمت سلمت

سلطان الاسيمر



شكرا شكرا الف !!

الاسيمر


تستحق الشكر على احسن الاختيار فـ سعد الحريص غير


مشكور

سلطان الاسيمر

بصراحه موضوعك جميل تستاهل الشكر عليه ..


سعد الحريص شاعر رائع و عذب جدا ..


اتمنى لك و له التوفيق ..

دمت بخير ..


*
*
*

لا هنت يا سلطان

بيض الله وجهك

سعد الحريص اسم مهم في سجل الساحه ..

الف شكر

.

نقل موفق لشاعر مبدع

لاهنت سلطان

.

هلا اخوي سلطان
الاختيارات رائعه بالفعل لاهنت وتسلم

يملا حضوره من حضوري وانا اغيب
..................وياما غيابي في غيابه حضرته


الله الله
الشاعر سعد الحريص .. من الشعراء المميزين
لاهنت على هذا الإختصار للواقع .. سعد الحريص
لك كل التقدير ..اخوك ابو نايف