الحفوه !!

السلام عليكم ورحمة الله وبركاته


اسعد الله اوقاتكم فردا ً فردا ً


لا تبرّقون جدا .. هذا من المواضيع اللي اللي ,, المهم ,,


الحفوه ..

الحفوه هي كيف الحال واخواتها ,,,

اعتقد والله العالم انها مأخوذه من الحفاوه .. مع انها مهيب دليل قاطع لكنها دليل حميميه في اغلب الاحيان ..

الحفوه عند العرب فقط لان غير العرب .. هاي .. هاي ,, باي .. باي واخلصت علومهم وحتى الهنود كيساهي تيكاهي وخلصوا والفلبينيين كوماستكا مابوتي وانتهى الموضوع ..


لكن عندنا .. ههيييييييييييه يا حنا نسوي سوايا

لازم لكل كلمة رد :

كيف الحال .. الله يجمل حالك .. والا طاب حالك والا زان حالك المهم ان كلمة الحال لازم تذكر او ممكن ان تأتي (( الله يسلمك )) بالنيابه

عساك طيّب .. جعلك طيّب .. او لعلك طيب او اي شي فيه طيّب او ممكن ان تأتي (( الله يسلمك )) بالنيابه

عساك بخير .. نفس السستم لازم كلمة بخير .. او ممكن ان تأتي (( الله يسلمك )) بالنيابه

ماجور .. الله يجيرك من العثور او كفيت العثور او الله يجيرك من النار المهم شي فيه الله يجيرك او يكفيك .. لكن ليس من الممكن ان تأتي (( الله يسلمك )) بالنيابه .. لانها هنا مالها سنع

والمعونه .. الله يعينك وانت ماشي نفس السستم وليس من الممكن ان تأتي (( الله يسلمك )) بالنيابه .. لانها بعد مالها سنع هنا ..

والسلامه .. هنا يجب ان تأتي (( الله يسلمك )) مو بالنيابه ,,

وغيرها من الحركات الحلوه مثل :

وش وقعك واخواتها


الجيل الجديد عاد غير شكل جاب اشياء حلوه .. مثل اخبارك وعلومك وش مسوي ؟؟

وش مسوي هذي مشكله مع الشيبان شاب حضارته طاغيه وناعم ومرتب وجا عم ابوه من البر وجاه الولد يسلم عليه ويقول شحالك يبه شخبارك شعلومك شمسوي ؟؟ الشايب يوم قال وش اخبارك .. بغى يسرد له الموجز فقال .. تسرك عاده بيكمل قال الولد وش علومك ؟ قال الشايب بعلمك .. قال وش مسوي ؟؟ قال ما سويت شي !!

والرد طبعا ً عند الجيل الحلو هذا على كل كلمه .. الحمدلله .. طبعا ً الحمدلله على كل حال لكن الشايب نفسه مع الولد نفسه لما قال الشايب شحالك قال الولد الحمدلله !! قال يابوك شايفني خبل ؟؟ يومك تحمّد !!!


والشايب الثاني يقول لواحد ثاني كيف حالك ؟؟ قال : الحمدلله بخير ونعمه ,, قال ايه انت بخير ونعمه وانا على سلالي مالي جعلك طيّب ولا الله يسلمك !!



واحيانا ً تتعدى الحدود الشخصيّه الى :

وش حال الذود !!

واحيانا ً فيه بعض اللزمات مثل شباب يشتغلون في الهئيه الملكيه في الجبيل وكلهم اللي زامه صبح واللي ليل ودائما تدرج بينهم كلمة وش زامك ؟؟

ابو واحد منهم جا وجلس عند ولده كم يوم وهو ما غير يسمع شحالك يا فلان عساك بخير وش زامك ؟ .. رجع لابله وكل ما واجه احد قال وش زامك !!


فيه بعض القبايل عاد لهم سيستم مرتب لازم تجيبها بالترتيب ..

كيف انتوا - عافيكم - طيّبين - كيف انتوا - ماجورين يارجال وبعدها كيف الحال وما جادت به قريحتك وانت مواصل ..


وبعضهم تكون لزمه ثابته :

تسيف الحال - طيبين - ويرد الثاني .. تسيف الحال - طيبين - تسيف الحال طيبين تسيف الحال طيبين وانت ماشي من الصوبين الى ان ينهيها عبدالرحمن حمد ويقول بخااااار ,,


زبدة الموضوع .. الحفوه هذي او بعضهم يسميها محاوله او اي مسمى ممكن ان تسمى به ..

هل لها اسلوب محدد يجب ان يتبع في كل مكان ام انها مجرد كلمات يتم تداولها بين الاشخاص .. وهل لها اهميه واين تكمن اهميتها ؟؟ وهل هي دليل على الحميميه فعلا ؟؟



الله الله .. علومكم يا رجال ؟؟

وعليكم السلام ورحمة الله وبركاته

وش مسوي يابو عبدالله

موضوع رائع وخصوصا لعينات معينه لازم انها تتدرس هذا الموضوع وتحفظه عن ظهر قلب

وهم شله وش مسوي


اما بالنسبه للحفاوه /

هل لها اسلوب محدد يجب ان يتبع في كل مكان ام انها مجرد كلمات يتم تداولها بين الاشخاص ..

ليس لها اسلوب محدد يجب ان يتبع حسب مااعتقد فهي تختلف باختلاف الاقاليم والقبايل


وهل لها اهميه واين تكمن اهميتها ؟؟

مهممممممممممممممممممممممممممه في كل حزه وخصوصا عند الاجناب والضيوف

وهل هي دليل على الحميميه فعلا ؟؟

لااعتقد انها دليل حميميه

مبارك الخليفه

موضوع يشد الأنتباه لذلك حبيت أدلي بدلوي مع العلم أنك ماخليت لنا شي لكن بنحاول نضيف شي

يقول المثل إذا جيت قوم أمش بسلمهم وإلا رح وخلهم
أنطلاقاً من هذا المثل بفسر الحفاوه حسب فهمي المتواضع .. يعني اذا رحت لهل الجنوب وانا من اهل الكويت لازم ..أقول الآتي //


ماجورين

ويردون علي / سلمت


ورد / طيب


ويردون / طاب الله فيك


وهكذا .... ولها نبرة معينة وجرة خاصة أي خلل يفتح باب من المناقيد يخليني العن الساعة إللي رحت فيها الجنوب ويسمون هذه الحفاوة ( المواجر)

وأعتقد ان لكل قبيلة اسلوب معين وطريقة معينه بالحفاوه وليس بالضروري ان يتحفاهم الأجنبي بطريقتهم ولكن بالكلام العام يعني وش حالكم ؟ طيبين وكان الله غفور رحيم

هذا ماعندي وسلامتك وفي انتظار حفاوات اخرى

مبارك آل خليفة




عن نفسي ردي المعتاد وقت الأزمات ( الله يسلمك )
وافردت له مقاله كامله يمكن اتجرأ يوم من الايام وانزله في المرقاب





( الحفوة ) مجرد روتين اجتماعي مهم جدا .. يدل على الادب والاخلاق والذوق والطيبه

وليست دليل على المحبة والحميمية بدليل انا نقولها حتى لأعداءنا

وهناك ردود مناسبة لكل سؤال .. ولكن البعض يخترع رد مختلف

او يمشي حاله بـ ( الله يسلمك )






مبارك آل خليفة


موضوع خفيف .. ممتع



متابعة للردود

يالله حيييه تلدغ عدوّهـ

حي الله ابو عبد الله ؟؟وشلونك؟؟عساك طيب؟؟شمسوي؟؟<-قد اوحيتها قبل ولادريت انها جديده

الوكااااد لي عودهـ بأذن الله وابنشّف ريقك بالنّشده

ابو عبدالله دايم مواضيعك طيبه و محببه للنفس ..

وعز الله انك صغت الموضوع افضل صياغه ..

وبالنسبه للحفوه حسب نظرتي ليس لها سيستم ثابت بس لكل مقام مقال و لكل فئه من المجتمع فئه معينه : )


و شي أكيد انها لا تدل على الحميميه لإنها روتين لانك أحيان تجبر تحفا شخص ما تدانيه بينما أحيان ودك تستخدم جميع مصطلحات
الحفوه لشخص معين يعني حسب اسلوب الحفاوه تظهر الحميميه ..

هلا وغلا يابوعبدالله .,
والحقيقه اننا بحاجة لمثل هذه المواضيع التي وإن كانت ساخرة شكلاً الا إنها تثقيفية المضمون في كل حال ., وارجو ان يتواصل طرحك لها .,

لا اعتقد ان للحفوّه مكان معين او نظام او زمن ملازم لها هي موجوده على مختلف الاصعده وبنفس الكثافة ., وقد لا ابالغ ان قلت بأنها عربيّة الاقليم .,
وهي تعود بالسلب اكثر من الايجاب بل قد تكون معدومة الايجابيّة .,
ليست بذات اهميّه ولكن لانستطيع تجاوزها بأي حال فقد اصبحت إحدى الجينات المكتسبه
خصوصا في المجالس العاّمه او المتوشحة بطابع الجديّة .,
أضف الى ذلك انها تطوّر منسوب اللياقة الكلاميّه وليس اللباقه .,

وفي مجمل الحال من استطاع الخلاص منها فهو بخير


سلامي عليكـ .,

أبو عبدالله .,


تسيف أنت .. طيّب .. ماجور .. والسلامة .. !
<<<<< حسب ترتيبها

اولا ً
حياك الله
ثانيا ً
لكل ٍ نمط واسلوب في الحفاوة .. !

وانت ماقصرت ماعاد خليت لنا مجال في الموضوع
وضحت لنا وبينت لنا ماهو الحال عليه في الحفاوة

لاهنت ولاقصرت
دمت بخير

ابو عبدالله

تعود دائماً .. بالأجمل

المهم ،، طال عمرك

الحفوه .. تسمى .. المقاوا ايضاً

وهي ضروريه جداً .. لقياس مدى (( إهتمام الشخص بالآخر ))
يعني سجل مثلاً .. اذا جيت لـ مجلس فيه 30 رجال
وسلمت عليهم كلهم .. كل واحد يكون له سلام خاص .. حسب المعرفه .. والقرب ( الروحي )
بعد السلام .. اذا جلست .. تبدأ في : إرسال : جمله حفاويّه للكل مثل : وشلون كلٍ بإسمه .
ومن ثم تبدأ في .. إرسال عبارات إحتفاء خاصه .. ابو فلان وشلون عساك طيب ...

هذا وسلامة عمرك .. يا سمو الشيخ

ابو عبدالله وشلونك وش اخبارك وشلونك وشاخبارك



والله العظيم اني امس اتكلم فالموضوع هذا


مايدبل كبدك الا لاقالك واحد وش اخبارك وشعلومك يااخوي مطرشني يومك تنشد من اخباري


ولا سالفة الحمدلله شايب ينشد له ولد حظيري وشلونك ياولد طبعا الرد الحمدلله وشحالك ..الحمدلله وشحال شيبانك ..الحمدلله فلان ربه طيب قال الحمدلله طالع فيه الشايب وطالع فوق وقال اي والله الحمدلله


الله يصلحهم بس

ابو عبدالله

الحقيقه انها جميله احيانا وسيئه احيانا
خصوصا اذا كان المجلس مليان على آخره
ودخلت تسلم وبلشت في واحد من المستعدين وقوفا للسلام عليك ومسك يمناك 3 دقايق ينفضها وينشدك عن عيال جيرانك حتى ! والناس واقفه وراه تحتريك

فيه واحد من الجماعه لا جيت تسلم عليه سحب يمناك بقوه وشبك على كفوفك وانفعل ( تقول يسلخ ذبيحه ما يسلّم يا دافع البلا )

ومثل ما ذكر ناصر تراحيب السلام ( البرايفت هذا ) مزعج احيانا بعد


عندي ملاحظه سريعه غير اللي فوق بعد

في اكثر من مره الاحظ السيناريو الاتي واستغرب صراحه
طبعا هالسيناريو في منطقة اقليميه محدده ما اقدر احددها

الأول : كيف الحال ؟

الثاني : عساك طيب ؟

الأول : عساك طيب ؟

الثاني : وشلونكم ؟

الأول : عسى ما تعدون خلاف ؟

الثاني : ربوعك طيبين .. واحتمال يضيف عليها بسرعه يوليّ الخلاف

الأول : الجماعه وشلونهم ؟

الثاني : عساك طيب ؟

الأول : عينت علوم المطر ؟

هنا يبدا عاد الحديث الطبيعي سؤال وله جواب

الثاني : يذكرونه من ايسر الضلع الفلاني للشعيب الفلاني


يعني لو تلاحظ محد درا عن حال الثاني هل هو بخير او فيه بلا لأن كل سؤال يرجع بسؤال مشابه !!

وهذا واقع والله ماهوب تأليف مني


يمكن الملاحظه خرجت عن الموضوع شوي لكنها كلها تحفّي


...

^^


ههههههههههههههههههه



كني قد قابلتهم


..

ابو عبدالله .. حي هالطله ..

موضوع رايق .. وماعندي زود على ماقاله الأخوان الا .. الله لايهينك على الطله الجميله ..

تحياتي

موضوع شائك .. جداً .. طبعاً ابو عبدالله متخصص في المعتركات الإجتماعيه


بالنسبه للحفوه - مصطلح تندرج تحته كل الألفاظ التي ذكرتها وذكرها الإخوان بعدك ..



البدو يقولون ( كثر السلام يقللّ المعرفه ) وأعتقد أنهم صدقوا في هذه المقوله .. وأظن يقصدون ترديد بعض معاني الألفاظ بأكثر من صياغة وتكون في النهايه ( تحصيل حاصل ) ..


عندما يودعك شخص ويهمّ بالسلام عليك فجأة تقول له ( كيف الحال ؟ ) عندها تكتشف أن نظرية
( ميكافللي ) مفصلّه عليك !



هناك أشخاص لديهم لياقة في السلام على أكثر من 17 شخص في 20 ثانيه - وين موسوعة غينتس عنهم !!



صحيح أن المجتمعات البدوية خاصه لاتستطيع التخلص من هذه اللزمات ، ولكن تعتبر جيّده لمعرفة الشخص ومدى تهيأه لـ بوابة الدخول في مجال ( السوالف ) والإنتقال للأحاديث والتوسع فيه !


أما بالنسبة لفئة ( شمسوّي ) !! فأعتقد أنهم أوقعوا أنفسهم في شَرَكٌ الرسميّه مع ( فئة العوادة ) بالذات ..




تصدق يابوعبدالله حتى في الرسائل الخاصه التي لايكون الرد مباشر مع الطرف الثاني - تجد - وشلونك - طيبين إلخ إلخ .. رغم ان السلام كفيل بكل شي .. إنظر للرسائل المتبادلة بين ولاة المسلمين في عصر الصحابه والتابعين .. قلما تجد رسالة ترحيبيه بعينها - يبدأ بالسلام ويثني على الله ومن ثم يبدأ بتوجيه الأهم في رسالته !



موضوع طيّب يابوعبدالله











أنت طيّب ؟ الربع طيّبين ؟

المشاركة الأصلية كتبت بواسطة محمد بن صويان

مبارك الخليفه

موضوع يشد الأنتباه لذلك حبيت أدلي بدلوي مع العلم أنك ماخليت لنا شي لكن بنحاول نضيف شي

يقول المثل إذا جيت قوم أمش بسلمهم وإلا رح وخلهم
أنطلاقاً من هذا المثل بفسر الحفاوه حسب فهمي المتواضع .. يعني اذا رحت لهل الجنوب وانا من اهل الكويت لازم ..أقول الآتي //


ماجورين

ويردون علي / سلمت


ورد / طيب


ويردون / طاب الله فيك


وهكذا .... ولها نبرة معينة وجرة خاصة أي خلل يفتح باب من المناقيد يخليني العن الساعة إللي رحت فيها الجنوب ويسمون هذه الحفاوة ( المواجر)

وأعتقد ان لكل قبيلة اسلوب معين وطريقة معينه بالحفاوه وليس بالضروري ان يتحفاهم الأجنبي بطريقتهم ولكن بالكلام العام يعني وش حالكم ؟ طيبين وكان الله غفور رحيم

هذا ماعندي وسلامتك وفي انتظار حفاوات اخرى

ما هي بكذا يا ابن صويان


لا جا الضيف و ألا اللي أنت مبطي منه في بيتك
تقول له : كيف أنت ؟
يقول لك : سلمت
تقول : طيب
يقول : طاب الله فيك

ثم العكس هو يأخذ دورك

و هذا اسمه ( الكيفنه ) أو ( المساول )

المشاركة الأصلية كتبت بواسطة محمد صالح العتيبي

موضوع شائك .. جداً .. طبعاً ابو عبدالله متخصص في المعتركات الإجتماعيه


بالنسبه للحفوه - مصطلح تندرج تحته كل الألفاظ التي ذكرتها وذكرها الإخوان بعدك ..



البدو يقولون ( كثر السلام يقللّ المعرفه ) وأعتقد أنهم صدقوا في هذه المقوله .. وأظن يقصدون ترديد بعض معاني الألفاظ بأكثر من صياغة وتكون في النهايه ( تحصيل حاصل ) ..


عندما يودعك شخص ويهمّ بالسلام عليك فجأة تقول له ( كيف الحال ؟ ) عندها تكتشف أن نظرية
( ميكافللي ) مفصلّه عليك !



هناك أشخاص لديهم لياقة في السلام على أكثر من 17 شخص في 20 ثانيه - وين موسوعة غينتس عنهم !!



صحيح أن المجتمعات البدوية خاصه لاتستطيع التخلص من هذه اللزمات ، ولكن تعتبر جيّده لمعرفة الشخص ومدى تهيأه لـ بوابة الدخول في مجال ( السوالف ) والإنتقال للأحاديث والتوسع فيه !


أما بالنسبة لفئة ( شمسوّي ) !! فأعتقد أنهم أوقعوا أنفسهم في شَرَكٌ الرسميّه مع ( فئة العوادة ) بالذات ..




تصدق يابوعبدالله حتى في الرسائل الخاصه التي لايكون الرد مباشر مع الطرف الثاني - تجد - وشلونك - طيبين إلخ إلخ .. رغم ان السلام كفيل بكل شي .. إنظر للرسائل المتبادلة بين ولاة المسلمين في عصر الصحابه والتابعين .. قلما تجد رسالة ترحيبيه بعينها - يبدأ بالسلام ويثني على الله ومن ثم يبدأ بتوجيه الأهم في رسالته !



موضوع طيّب يابوعبدالله











أنت طيّب ؟ الربع طيّبين ؟

يا أخي أنت وش تقول ؟؟

زانت علومك يا بو عبدالله

المشاركة الأصلية كتبت بواسطة سداح

ابو عبدالله

الحقيقه انها جميله احيانا وسيئه احيانا
خصوصا اذا كان المجلس مليان على آخره
ودخلت تسلم وبلشت في واحد من المستعدين وقوفا للسلام عليك ومسك يمناك 3 دقايق ينفضها وينشدك عن عيال جيرانك حتى ! والناس واقفه وراه تحتريك

فيه واحد من الجماعه لا جيت تسلم عليه سحب يمناك بقوه وشبك على كفوفك وانفعل ( تقول يسلخ ذبيحه ما يسلّم يا دافع البلا )

ومثل ما ذكر ناصر تراحيب السلام ( البرايفت هذا ) مزعج احيانا بعد


عندي ملاحظه سريعه غير اللي فوق بعد

في اكثر من مره الاحظ السيناريو الاتي واستغرب صراحه
طبعا هالسيناريو في منطقة اقليميه محدده ما اقدر احددها

الأول : كيف الحال ؟

الثاني : عساك طيب ؟

الأول : عساك طيب ؟

الثاني : وشلونكم ؟

الأول : عسى ما تعدون خلاف ؟

الثاني : ربوعك طيبين .. واحتمال يضيف عليها بسرعه يوليّ الخلاف

الأول : الجماعه وشلونهم ؟

الثاني : عساك طيب ؟

الأول : عينت علوم المطر ؟

هنا يبدا عاد الحديث الطبيعي سؤال وله جواب

الثاني : يذكرونه من ايسر الضلع الفلاني للشعيب الفلاني


يعني لو تلاحظ محد درا عن حال الثاني هل هو بخير او فيه بلا لأن كل سؤال يرجع بسؤال مشابه !!

وهذا واقع والله ماهوب تأليف مني


يمكن الملاحظه خرجت عن الموضوع شوي لكنها كلها تحفّي


...

الله لايهينك يابو عبدالله على هالموضوع الرائع



وانا اشاطر الاستاذ سداح الراي


وهذا هو الواقع



أجمل التحايا للجميع

المشاركة الأصلية كتبت بواسطة محمد آل عبدان

يا أخي أنت وش تقول ؟؟

ابد اسولف على نفسي

المشاركة الأصلية كتبت بواسطة مشعان البراق

خصوصاً اللي بالازرق / في الثمانيات ,

ابو عبدالله :-
يا حي هالطله .. اي والله ,

أكيد صارت معك مثل ماصارت معي

-




-


وش وقعك يا مبارك



موضوع مهم وملاحظ .



بالنسبه لي اتفق مع رأي زملاي في اغلب النقاط .



×× وهل هي دليل على الحميميه فعلا ؟؟

ياكم واحد يكثّر منها وهو ما يطيق اللي قدامه




مشكور يا مبارك ولاهنت

دافع البلا اثرك ماخليت احد


حتى هنا متولج العالم

:
:

(( الحفوة )) ..

هي فن تقريب وجهات النظر ..
بين زائر قادم ..
ومزيور مقيم ..
وهي (( أطار )) أجتماعي يجعل الصورة الاجتماعية أكثر جمالاً ..
وهي لغة حديث ظاهرها (( الأهتمام )) ..
وباطنها .. سر في بطون أهلها ..
يحرص المحتفى فيها على أن يكافح اي (( نقطة )) خطأ ..
قد تتسلل اليها فتطبع لها أثر تحت (( حائها )) فتقلبها (( جفوة )) .. !!

بأختصار هي فن أجتماعي ..
نتمنى له طول العمر ..
رغم أنه قد يخضع لـ (( المبالغة )) احياناً .. !!

صديقي ..
مبارك .. وضعت هنا .. (( نقطة )) جديرة بالاهتمام ..
وطبعاً تختلف عن النقطة الملقوفة السابقة التي قلت الحفوة الى جفوة .. !!
كل الشكر لك .. !!