ماذا تسمى ؟؟

السلام عليكم ورحمة الله وبركاته


قبل لا يتشمّت الشمّاته هذا آخر مواضيعي اللي من النوعيّه هذي


فيه اشياء يقولونها الناس من ضمن كلامهم العادي ولا ندري وش موقعها من الاعراب .. او مصدرها اللغوي !!

فلذلك نحاول ان نعرف وش تسمى ,,


مثل : لو حاولت الاستماع لموضوع وهناك شخص ملقوف يدخل في الخط !! فـ تقول له : صه !! او اص او اسكت او البخ او شب او اي مفرده معناها الذرب .. اسكت لو سمحت

لكن فيه ناس يقولون (( اشششششششش )) هذي وشهي !!

ومثل : لما واحد يبي يابلفيت انه شبّاب ضوّ وهاب ريح وقام في الشتاء وراح وجاب حطب وحطّه على الضو ولمس له جمره !! اما بيعتزي والا بيصيح - الصياح هنا مهوب البكاء !! الصياح يعني يقول ياااااااو - والا بيعض الغتره والا يقرّط في برطمه والا يسوي اي شي

لكن اذكر لي ناس واجد حتى لو قرصته قروصه قال (( احححح والا احححيه )) هذي وشهي !!


ومثل : لما واحد يسولف على واحد سالفه ويقوله فلان وهو خابر فلان فقري يمص الثلج وساهم في اسهم قد ساهم بها ذاك متلقي السالفه لكنه احتد وباعها يوم الاحد وبعد اسبوعين ارتفعت الاسهم والفقري المسيكين عنده نفس عدد اسهم متلقي السالفه لكنه جاه فيها نص مليون والا ربع مليون ما جات المتلقي !! فمن المصطلحات اللي من المتوقع ان المتلقي يقولها : الله يوفقه والا الحمدلله رزقه والا الدنيا حظوظ والا انا لله وانا اليه راجعون والا لا حول ولا قوة الا بالله والا يقول الله يلعنها شركه والا شي من هالقبيل .


لكن فيه ناس اعرفهم جدا يجيبون اشياء ثانيه مثل :
(( افففف )) والا (( أبببب )) والا (( بللللللل )) والا (( آه يا كبدي - لا هذي من الصنف الاول - )) والا (( طـ طـ طـ طـ طـ طـ طـ طـ )) .. وش ذولي ؟؟


فانا اسأل هذي تسمى حروف والا كلمات والا وش تسمى بالضبط ؟؟