راعي الجماله للوالد الشاعر فليّان بن ماضي ابو راس

[POEM="font="Simplified Arabic,5,blue,normal,normal" bkcolor="transparent" bkimage="" border="none,4,gray" type=2 line=1 align=center use=sp num="0,black""]راعي الجماله ينجزى بالجماله=قال المثل الأعمال تجزى بالأعمال
من يعمل المعروف يلقى بداله=عند الرجال الطيّبه حسن الإقبال
المال زينه للرجال وكماله=والمال ما يستاهله كود رجّال!
يظهر حقوقه لا بدى له مجاله=للضيف والجيران والعمّ والخال
وجميع من له حق من كل آله=وإبن السبيل وصاحبه ذرب الأفعال
ولاّ ردي الساس لو زاد ماله=عليه غربالٍ ، وياويّ غربال!
هو ما درى إن المال عجْلٍ زواله=أيضا وهو عن كل دنياه رحّال!
ليت الردي ربي يقلل حلاله=لا صار ماهو للثقيلات حمّال!
أنا أشهد إن الطيب صعبٍ مناله=ولا كل رجّالٍ على الطايله نال!
يناله اللي كل صعب إرتكاله=يصبر ولو إن الزمن جار ، ما مال..
عن منهج أهل الطيب وأهل الشكاله=ويحب عز النفس في كل الأحوال!
واللي كفاه أفعال عمّه وخاله=يقال ضايع ضيّعه كثر الأقوال!
الرجل لا يفخر يا كود بفعاله=لا يفتخر باللي مضوا ذيك الأجيال!
يفخر بفعله كان عنده رجاله=والرجل لا منّه ركن يركن بجال!
جالٍ شديد ولا حصل به هياله=ماهوب لا منّه بني فيه ينهال!
اركن على ضلعٍ يذّريك جاله=والنفس صنها لا يجي منك الإهمال!
النفس جنّبها طريق الرزاله=وإصعد بها للمجد يا طيّب الفال
ولا فيه عقده غير وإلها إنحلاله=يحلّها اللي للصعيبات حلاّل
ولا ترافق كود رجْلٍ مضى له=فعلٍ مجيد ، ولا تغرّر بالأزوال!
بعض العرب تعجبك سنحة خياله=وهو بالمواقف ما يساوي له ريال!
كثير زوم ولا يثمّن مقاله=قليل فود وبالخطا دوم عيّال!
وليا جرى لك من زمانك مياله=يروغ عن دربك كما روغة ظلال!
ولاّ الوفي يبذل حلاله وحاله=ليا ندبته يبذل المال والحال!
كل الثنين أعطيت عنهم دلاله=والتجربه أكبر دليلٍ بالأمثال!
ولاني وكيلٍ لآدمٍ في عياله=قد قالها قبلي عوارف وعقّال![/POEM]

لـ فليّان بن ماضي ابو راس السبيعي