لين الندى منها على حبها ماع .......قصيدة أعجبتني

بسم الله الرحمن الرحيم

اعزائي أعضاء المرقاب الكرام

السلام عليكم ورحمة الله وبركاته

أترككم مع هذه القصيدة والتي أعتبرها من وجهة نظري الشخصية من عيون الشعبي

ولكم الحكم على القصيدة بعد قرائتها وتقديري الجمّ ؛؛؛
[poem=font="Simplified Arabic,5,black,normal,normal" bkcolor="transparent" bkimage="" border="none,4,white" type=0 line=0 align=center use=sp num="0,black"]

لاع الحشاشة لايع لاعها لوع= البارحة يوم المخاليق هجاع
كن النفس عن صدري الضيْق مقطوع = والعين مانعها عن النوم مناع
ياصاح ترسلي تراديد ورجوع=وأقول ياللي لاع خاطرك مالاع
تشكي وقلبك من مراكيه مقلوع=شكية ٍ من دونها ستر وقناع
ماهيب لغز اللغز ياصاح مرموع= اللغز له مغزى ورمعه ورماع
وأنته عن الموضوع ماجبت موضوع = وأنا ماغير أروجع الصوت روجاع
تقدير والتقدير مثني ومربوع= بعنان صفراً فأول الخيل مزواع
تجمح وفيها للمزاهيف قاموع= للعدل ميزان ٍ وللحق مقطاع
عندي وأنا اللي يجذب الروس من قوع = وليا امتلى المولاع شبيت بولاع
اشبها وأسرج دجى كل مهجوع=لاحافها اللي له مع أشناقها أرياع
وليا غدا للنار قيعان وفروع = من عقب ماعرضتها كل ذعذاع
جحيت عنها اللي مثل حبة الكوع = ماهوب كوع ذراع كوع ٍ على أضلاع
ثم جبت محماس ٍ على الشف مصنوع= وأخذت فيما تحتوي خمس الأصباع
برية ٍ قلبتها عرف وسنوع= لين الندى منها على حبها ماع
وفالمبرد اللي بالمقامير مرصوع=نثرتها وأظهرت من حبها أنواع
اظهرت لي شي ٍ عن الكيف ممنوع =حيث ان مقلاعه عن الكيف مقلاع
خزايز ٍ دقيتها فرد وجموع = ولحبها الماواه مهواه قراع
وليا اختلف صوت بالأنغام مسجوع = حدرتها فاللي على النار مكواع
شقرا وماها يقتلب فوق ويفوع = يفوع فوع اللي كفخ عقب مفراع
وليا استوت زليتها فام قبوع=هيفاً عليها من مها بعض الأرماع
الحلق وصف هلال والعنق مرفوع = تشدي لغرنوق ٍ على جال منقاع
وبهارها عندي من الخمس مجموع =يبري عماس الراس ويداو الأوجاع
يفتح لشرابه ثمانين مشروع = ويبدل المرماع الأول بمرماع
هذا واخذ من در الأيام قرطوع= لو انها تصفي كذا مالها داع
لابد في حبل الفنا وصل وقطوع= ياقلب لوانك مولع وملتاع
ياقلب لك معلاق ولصدرك ضلوع = مانته بسلعة بين شاري وبياع
خل الجوارح لك مطاويع وخضوع= واطلق مسابيق التجلي والأبداع
وانا ليا من الهوى شاعني شوع= ولا ليا ضاق النحر والسنع ضاع
أصخر عنيد القاف واطوعه طوع= حتى تهيض له المشاعر والاسماع
وأسقي عنود الفكر من كل يبنوع= اللي عنيت لها بملزم ومصراع
قلته وصلى الله على خير متبوع= الهادي اللي للمخاليق شفاع
والقول لامسبل ولاهوب مجبوع= بني الضمير اللي على درب الأسناع[/poem]

للشاعر فاروق الكسر