الوصل العنيد

[poem=font=",6,darkblue,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]

ذهني الصافي دليلي في متاهات القصيد= مايتوع ولا يخالف لين احقق مطلبي
أتبع اجموع الجوازي لين اطمنها واصيد= وماتعدت راس نابي ماتعدا مخلبي
ماأحب الا الجفول اللي مراميها بعيد=يوم اقلطها مضاربها تبيّض شاربي
ترفع القدره ملوك ويخفض العجز العبيد= تلكمو منظور قلب الكهل بعيون الصبي
صانع الأبداع يبدو ملقي السمع الشهيد=في ترانيم ابن عون وفي هجوس الاكلبي
كنت احاول أتحاشى أنفاً بعض النشيد= محض اراده ليس الا لم يكن في مأربي
أكبح اجموح القوافي عن جموحه لايزيد= في ضميراً مبتلشني مايبالي بتعبي
كثر ماعطيته وما قدمت له عيا يهيد= كل ماجيت اتريح قال ياهذا نبي
هاضه اللي في عيونه يبرق الوصل العنيد=جل من أبدع وكمّل صورة الزين الأبي
من يقول ان النعومه ينصهر منها الحديد= مايقوله في وصوله بين دقني وشنبي
طلّته حلوه تحاكي فرحة العيد السعيد=فيه من لون الأعاجم مار ملحه يعربي
زين عين وخد ورد وجود عود وجيد صيد=مختلط فيه العسل مع طعم سم العقربي
باسقه وفروعها من عاج مع طلعً نضيد= شامخه فيما يقارب قيد رمحً تغلبي
ملمسه ناعم ويشرح قصة العيش الرغيد=ذلكم تالله وبالله ماسبى حالي سبي
فيه رقّه فاتنه فوق القساوه أو يزيد=ماتنؤ ابه القلوب الصاملات وتُغلبي
فوق راس المال عنده فيه فايض فالرصيد=ينفصل عنه النظر في حد خصراً لولبي
شي دايم مستفيد وشي ماهو مستفيد=كنّهم في سوق الاسهم فالزمان الشقلبي
جزء منعم في سلام وجزء في حالً زهيد=قسمةً ضيزا تجلّت واضحه ماتغتبي
لا أبد ماهو خرافه بس في نوعه فقيد=من أعاجيب الزمان الباهره في كوكبي
ذلك اللي كنت من لقياه فالدنيا تحيد= قالها بلسان حال الرمش تحت الحاجبي
سلّ سيفه واغمده بين التراقي والوريد=صابني في مقتلاً صعبو علاجه أصعبي
لخبط اعدادات عقلي واخلف العقل الرشيد=وانتثر من زود زينه كل مافي مزهبي
كل ماجيت اتجاهل واتناسى مايفيد=أبتعد لكن طيفه من خيالي يقربي
كل ماافرمت خيالي ايتبرمج من جديد= أحذفه والقاه فجأه فوق سطح المكتبي
كيف يصحيبي نيوتن صاحب العلم الفريد =أكتشف مؤخراً أنك طلعت اكبر غبي
للاسف ياصاحبي ماجبت لي علمً أكيد=شيل قشّك ويهبي وانته بعد معه تهبي
لو ماشفناه شفته أعترفت انك بليد=كيف تسقط من حسابك آية عيون الظبي
وانت ياعنتر ولد شداد يالباس الشديد= يامغلّظ فالجماجم كل سيفً أحدبي
لو تشوفه طاح سيفك من يدينك بالوصيد=عقب صولات المعارك رحت تحبي له حبي
تعتذر وتقول ياعبلا ترا ماني وحيد=دوّري غيري أنا مشغول عني أذهبي
لايمي عفواً تمهل في ملامي لاتزيد=ماذكر أعلاه ردة فعل عما حل بي
ياألهي لاتؤاخذني بما عندي عتيد=بس يومنّه رمالي كورته في ملعبي[/poem]