********** مع مستور العصيمي **********

--------------------------------------------------------------------------------

مستورالعصيمي=
مرحبا واعداد ما بان نجم في سماه=في محل العزوه اللي رفيع شعارها
يكذب اللي يحسب النوم اخير من الصلاه= ملعبتنا طيبه واربعه شعارها

سعيد الفهري=
البقا بك يا عصيمي ومعرفتك غناه=بالنيابه عن رجال تولع نارها
المجاهد عنده الموت اخير من الحياه=ملعبتكم طايره والعقل طيارها

مستور=
من يطب السوق يعرف لبيعه من شراه=والسلع تفرق على بعضها باسعارها
حكم رب الكون يغلب على حكم القضاه=جاتك الثنتين واللي تبيها اختارها

سعيد=
من سبح فالبحر يحرص على طوق النجاه=كل غبه عارفين شكل بحارها
اليتيم اللي تعشّا يابو تركي عشاه=ما معه غير المعيشه لا يرجي غارها

مستور=
من ضمي لو يشرب البحر ما يقطع ضماه=لليال اسرار ماحد يعرف اسرارها
الجراده حلها الله حلال بلا ذكاه=خل عينك من يمين الدير ويسارها

سعيد=
من ضمي يارد على عد راهي في سراه=والمطيه لو تلّقي يموت حوارها
ان تغديت الجراده تعشيت القطاه=وان خبطت الارض فوقك يطير غبارها

مستور=
جاك مني علم واللي ورا قلبي وراه=من عرف مدخالها عارف مضهارها
مالك الاثوب ابيض جديد من طواه=لاتمنى البدله اللي ضعيف زرارها

سعيد=
كل مومن مبتلى والله الخالق بلاه=والرجال الطيبه ماتموت ادوارها
مالك الا القدر والرجل يكرم من نصاه=وانت عود تعرف صغارها وكبارها

مستور=
خل هضبة نجد تدري عن جبال السراه=سلم البندق يد اللي يحفظ عيارها
الديار ديارنا مالكم غير الحصاه=عقب ما جربت حلواتها وامرارها

سعيد=
الرجل في بعض الاحيان يبحث عن عراه=والحرار الشقر يمدي تعرف اوكارها
السيوف سيوفنا والجنايز فالفلاه=والقبور المستطيله تعب قبارها

تحياتي وتقديري للجميع

ياسلاااام


محاورة جميلة
ومع عملاق شعر

الله الله


طاروق كايف وشعراء كبار


لا هنت ياسعيد ولوهو غريب عليك الابداع

طاروق جزل بمعنى الكلمه



الله الله صح لسااااااانك ياسعيد ولسااااااااااااان ابو تركي

طاروق جميل مع علم من اعلام المحاوره

الف شكر لك يا سعيد ولا هنت

لاهنت على النقل يا سعيد

وصح لسانك ولسان الشاعر الكبير مستور العصيمي

تحيتي واحترامي ياغالي

اخوك