[[[ سيـــــاحة منـــــــاعيـــــــر ]]]

[frame="2 80"][align=center]ــ مسا الخير للجميع

واسعد الله جميع اوقاتكم باالخير
والمسرات ..


قصيدة متواضعه
أضعها بين ايديكم

وتحت مجهر ذوائكم الكريمه
وأمام اعينكم الذواقه ..



أتمنى لها القبول والرضا ...




[poem=font="Traditional Arabic,7,teal,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
الصبر صفصف من ورا الصدر يامنير = وآكفخ سطر من فقد قلبي مرامه
الجيب : جالي عنه صادوف . ماغير = آستآجره . وإلا آكتفيت بسلامه
شبّوا ورا سعره .. اعيال الهوامير = وآصبح بعيد لمن تشّرب ريامه
وقت ن تقفّى اشفوفنا باالسواطير = آلين مآحت من خشَشْنا الوسامه
ولا حال دون آهواك قل ن وتعزير ؟ = أمر من حاجتك عند الهلامه
لكن جدانا الصمت لو المقادير .. = أشد من غدر الدخيل لعمامه
يامنير لي اسبوع مانيب في خير = اجزع وآنافس باالمطير الحمامه
ومن المأذن التالي الين العصافير = تصدح نغم قدّام فسخ الجهامه
وشوح السهر يودع عيوني مجامير = كن الجليجل في جفوني دوامه
فقدت ياابن معيض قطعة مشاوير = تآخذ على زود الوناسه علامه
موجع ضرمها . من حنين وتفاكير = كني عليها طفل يشكي فطامه
بديار ماضَريَت عليها السيياير ولا ايبَس نواميها سليل النعامه
ولا شيف فيها من عسوس وصقاقير = ولا آحفى معارقها مبنّي خيامه
ولا طبّها كشّات من صبح . لعصَير = متعافي البدنَه وشابع غشامه
سبحان خالقها بديع التصاوير = تآرد شفوق ولا تصّدر ندامه
لا هي نفود ولا صباخ ومكاسير = ولا هي عبال معيّفَتْك الحوامه
لا جيت اسميها ( سياحة مناعير ) = واللي عن السجّة حرام ن صيامه
حرّة سويط وشوهقان القصادير = وفَليَ البحَص شرقه وغربه وشامه
وحبران ذكّرني بآآبآنآت والنير = والدلو يآخذ من علاوي تهامه
متفّتق ن فيها الزهر والنواوير = والشيح والقيصوم مثل التوامه
وطرح اليَهَق نبته تقل نبت جرجير = وقشِع الرتَم مثل الثمام استقامِه
والطلح في ظلّه : عرايش جماهير = وحشايش ن في منتِشَرهَا انسجامه
ونهّاض رجليّه عدّو السماكير = كن الولي معطيه عنهم كرامه
اللي من اليابان مصنع وتصدير = مامرمسوه الصين مع فيتنامه
كنّه مطربَل من جلود الخواوير = اشهب مرشّه . صفو . عسجد رغامه
جيب ن مقفّص لا وقف كنه الزير = واليا مشى بهوين ممشى زعامه
ولا فزّ كنه من ركونه يبى يطير = وكن الكفر من فوق ياي ارتطامه
وكنّه يذوق من المنشّط تقاطير = وتقوم في وسط القزوز القيامه
اجعص قفا . مربوع مافيه تطوير = ولا هو منفّخ تحت بند الفخامه
كنّه املّحم . ماتقول بمسامير = متماسك ن في حبك بديِه وجامه
وصداّم من فولاذ وسطه شناكير = تقل اعتبَه في قصر يلمع رخامه
عليه كشّافات ماهي دواوير = مثل الضويحك . في جما زين قامه
واوّصف التنده تقل خوذة ابعير = هرش ن ولد جرمي ردوم ن سنامه
والوجه وجه الذيب لا حوّل مغير = زاويه برد الجوع يبغى طعامه
ورفارفه عن التواير مشامير = ولصقة اسبيره فــ الظهر تقل شامه
مايشكي التفّه ولا حنّة السير = واسرع من البرق العمود ابترامه
وفرامله : ضبط الدركسون والقير = ( وهل من مزيد ) اسمه على كل خامه
ومعي ابلج ن ماهو رباوة معاثير = من صلب عود ن باالثرّيا مقامه
سعود لا راحت عبوس ومعاصير = ياحظ من حطّه بريمة حزامه
حر ن مجاذيبه خيار المواكير = يازن ذهب من كاحله للعمامه
ماهو حضيبي ن يحسب المخاسير = سويد فعل وتنقده من كلامه
ماذاق مس العوز مغرم دنانير = وسبّابتة تفرك طبيعه بهامه
طوي الرشا من خوّته طهْر للبير = وماردّه الشبراق حظ القمامه
ومطعومنا فيها خشوف ولحم طير = وجرم عدنَه جايد وصافي ادامه
ومشروبنا نقع المزون المزابير = بأعلى الصفا الصافي مهّل الغمامه
والنار لا شِبّت زراق وتساعير = من سمر ماهي قشِع والا ثمامه
وشبوبها لا هو بقازن ولا كير = رمث ن يباس من المنابت صرامه
والكيف دارج باالدلال المباهير = يَجلا عن الراس المغوشي منامه
وسوالف ن طرفه وشعر وتعابير = وذكرى القصصَ باالمرجله والشهامه
ولا انسى ضحَويّه يوم نمشي مخادير = قمزة على غفله ضبّي العدامه
تقول بطنه واربعه من طباشير = وشعر اظهرِه باالزعفران التحامه
وجرعة نشاط احيَت عروق النواطير = والجيب فرّه من يصون استلامه
متقاسمين الجيب جن وسعاطير = وابعد من الزهره علينا الرخامه
العين : ترقب مزبنِه حيث ماذيِر = والوجه مابين اكْضُمَه وابتسامه
حتى : قسَمْه الله طعام المداوير = اللي على المقناص تدفع غرامه
من كف رماّي ن ولو هي شمنصير = تقول دربيل الشميزر امامه
ومن فريَة البعّاج والمحرق تصير = مناسم المرمي على اقسى عضامه
سجّة لها باالقلب يامنير تآثير = يوم العذول مريح شهره وعامه
عدّيت ماواجهت ماآحتاج تذكير = ويكفي عن استرسال قافي ختامه
ومادام منها كل ابونا مدابير = الرابح اللي عاشها بااستقامه
هذي طراة العمر من دون تبرير = في وقت مكسب من غثاه : السلامه [/poem]
وسلامتكم
ياالربع
واعذروني على
طول القصيده




*********[/align][/frame]