وإن كان ما رد الرجل حادي العيب=حرام ما يقدح زناد القرامه

الحياه التجاريب

[rams]http://alfnon1.net/files/1242.amr[/rams]

[poem=font="Simplified Arabic,6,black,bold,normal" bkcolor="transparent" bkimage="backgrounds/35.gif" border="outset,10,skyblue" type=2 line=0 align=center use=ex num="0,black""]
يا عالم اسرار الضلوع المحاديب=يا من نصلي له ونخشى انتقامه
يا مجري الما في نياط اليعاسيب=يا منشي الطل في جيوب الغمامه
يا رب ورّدني لعذب المشاريب=وادلف على قلبي براد السلامه
فإن العمر مجبول بالشك والريب=والعاقل اللي لازم الاستقامه
للقرم وقفه وانتباهه وتهذيب=والخبل له نشوه وحفرة ندامه
وإن كان ما رد الرجل حادي العيب=حرام ما يقدح زناد القرامه
والمرجله يا صعبها من مكاسيب=يا كم زبونٍ وردته العدامه
يبغى لها قرمٍ يدوس اللواهيب=حتى يجي قسمه من أعلى سنامه
يصبر صبر سود الدليّ المجاذيب=حتى على راسه تزين العمامه
والرجل ما يَعرف سوى في المواجب=يثبت بميقافه ويكرب حزامه
ما قد خنع صوته لشذب العراقيب=ولحوم خلق الله ماهي من طعامه
صمصام شغمومٍ عطيب المضاريب=يعجبك في فعله وحكمة كلامه
كسبك يزيده فخر بين المناصيب=يفرح بكسب ايدك ويطول مقامه
حتى ولو فعلك غشته المثاليب=عند العرب قال الفعل في تمامه
زادك من امداحه مابين الاجانيب=حتى تصير امداحك اسمى اهتمامه
والبعض ما يتصيّد إلا العذاريب=حسود وانجازك يكدر منامه
يتلحقك بين العرب بالمشاهيب=هذاك عدّه من طيور الرخامه
والذيب مدهاله بروس المراقيب=وإلا الثرى ماوى للراس النعامه
والصقر يدمي صيدته بالمخاليب=يضرب ثناديها بعزم وصرامه
والبوم في عشه يجرّ النواحيب=بومٍ ولَد بومٍ سكن عش هامه
والمحقره يا كبرها مالاقاريب=خصوص ممن تعتقد به فهامه
وإلا ليا جت من عزيز الاصاحيب=يا كبر عذروبه وما اكبر ملامه
تصقر بقلبك مثل صقر اللواهيب=والمشكله وشلون تنزع سهامه
والقاصي إن هز العصا والمشاعيب=ما حد يلومك لو تكسّر عظامه
ترميه رميه ما بعدها تطابيب=وتغيبه فالارض تسعين قامه
والشيب بوجيه النشاما ماهو عيب=عيب الرجل لا غاب عنه احترامه
واللي تعلق في زيون الرعابيب=يصبر على همه وسطوة غرامه
واللي مشى في مدلهم الاكاذيب=دربٍ مشى به يوصله للندامه
واللي ترفّع عن جميع الغثاريب=ماله جزا من بعدها إلا الكرامه
والطيب لا تستغربه من هل الطيب=قوم الوفا والجود وأهل الكرامه
يستقبلون ضيوفهم بالتراحيب=والهيل والتقدير والابتسامه
ما دامت الدنيا لصالح ولا شعيب=ولا دامت الافراح لابو دلامه
يومٍ تصّوب فرحة الوقت وتصيب=واليوم الآخر حزن وإلا انهزامه
والناس مجبوله ولا تعلم الغيب=إلا إننا نومن بيوم القيامه
نشقى ونتعب طاردين التسابيب=وآخر مصير الرجل يطوى بخامه
ما ينذخر غير ابتهال المحاريب=والحج واخراج الزكاه وصيامه
يعرض للاعين ما كتبه الكتاتيب=في يوم يدلج كلنا من زحامه
في يوم ما ينفعك كثر التناديب=كلن يردد قول يالله السلامه
والعمر فاني والحياه التجاريب=والرابح اللي حسّن الله ختامه[/poem]
محمد بن حمدان المالكي
1-12-1429هـ