تعالي ياهجوسي وأقلطي جا للمعاني باب

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
تعالي ياهجوسي وأقلطي جا للمعاني باب=مشرّع لك كرم بيت القصيد بقافه وشطره
أنا وأنتي وليلي والهبايب والقلم وكتاب=تخاوينا مثل خوّة مطانيخ على الفطره
معي بعض النصايح وأسمعوها ياأول الألباب=نصايح واحد شاف وسمع ماجابها بطره
تعلم فالحياه وميّز الصادق من الكذاب=تجاريب الزمن تدعي له التبصير وتخطره
لو ان توه شباب وعارضه من دنيته ماشاب =على قول المثل ماكل شايب شيبته شطره
كفانا الله شر معلّبات تورث الأنشاب=تضيع ابها العقول وتصبح الجمعات منشطره
يروجها هوامير ويوزعها شلل واحزاب=تواصوا بالردى فالمجتمع وأفعالهم خطره
يغرّون السفية ويتركونة بين سن وناب= مابين الخوف والترهيب والترغيب والصطره
عليهم كنة اللي ساقة الخافق على الاحباب=يدوّرهم ويلحقهم ولو راحوا لسومطره
وهو لاقلّ مالة وانطرح صاروا كما الاجناب=وفقد ميقافهم من بعد فقد السيره العطره
الا يا جاهل الارهاب هذي ملة الارهاب=دمار للبيوت وللنفوس وما دخلت قطره
أما خافوا دعا شايب وشيبه دمعهم صباب ؟!=ولدهم سمموه ودشّروه ووقفوا مطره
أوادم مالهم بالمرجلة كود الغتر وثياب= تسرّحها تضوّيها ولا تحمل بعد صطره
ليا صار الرجل مايردعه دين وسلم أعراب=ولا عيب ولا شيمة عرب بالطيب لاتطره
وبشّره الفضيحه والعوض بلواه فالاقراب=ولو يمهل له الله مقدم الأيام له نطره
ماأقول إن المراجل بالكلام وفتلت الأشناب=وعقول لو تقلّبها ولا تلقى بها قطره
أنا أقول المراجل طاعة الله والولى وإصحاب=رجال كنها عود من أطيابه نفح عطره
عزانا فالحياه أيامها زاد لنا وركاب=ويموت الآدمي عابر سبيل ما قضى وطره
هذا قولى ومن عارض على قولي يسفّ تراب=أجل كيف الجسد يسلم وفيه الكبد منفطره ؟؟!
[/poem]