تحطيــــم الأرقـــــام !!!

السلام عليكم ورحمة الله وبركاته




[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
عب الورق يا ناقل الحبر عبّه = ما عاد فيني للدفاتر والاقلام
أفكار راسي عند رجلي مكبّة = والراس ماله قدره .. ولا له اقيام
دارت رحى الأيام من فوق حبّه = يا شين دورات الليالي والايام
تقرص عقاربها بليا منبّه ! = الوقت متسمم .. وتوقيتها سام
بانت وجيه أيامنا المشلهبّه = عقب أتّقوا عنا مفاريص الأخصام
ما عاد تلقى حي يعطيك لبّه = تحطموا مع درب تحطيم الأرقام
اللي هبد له لغْم واللي مطبّه = هذي هي الدنيا مطبات وألغام
يسد فيها ثوب صيفي وجبّه = واشماغ عادي ما هو اشماغ بسام
واللي ملا بطنه .. وخرجه .. وعبّه = قله تراك احطام تجمعلك احطام
يا اهل القصور الفخمه المطلحبّه = سوى سوى مع بدو نزّالة اخيام
الطيب اللي يقضي اليوم نبّه = ويلقى على قدّه متر في متر خام
حتيش لو طالت عمار المسبّه = أيام وأسابيع واشهور وأعوام
العمر تكويعه .. وتجديد شبّه = والموت لن جا .. جا ومن غير عزام
باب ٍ بلا مفتاح وابدون ضبّه = ما هوب حاجة طق لو كلّه إلحام !
عرفتها وأنا من أول مشبّه = فأحلام ورديه .. ووردية احلام
ما يفرق العاقل .. وخطو الجلبّه = الاّ حدود النظره اللي للامام
يا ذيب عان الريع ذبّه واذبّه = تراي انا وأياك فالطرقه اليام
أما بديت ابنا على راس تبّه = والاّ رخصنا عند رعيان الأغنام
كب الخوي اللي يحسفك كبّه = حتى ولو أنه مصلي وصوام !!
يحبطك واذراع العزيمه يجبّه = وإن طحت ما يرفعك .. وإن طاح ما قام
من عظم ساقه فالطلب ما صلبّه ؟ = ماله عصب في ساقه ولا له اعظام
ليته مريض أعضا ويعبا لطبّه = مار امرضه يحتاج قلاع حجّام
علاقةٍ ترميك فيك كل غبّه = ما شرعت وإلها حكم غير الأحكام
لا هيب لا سنه ولا مستحبّه = ولا هيب مكروهه ولا هيب حرام
مسجد لكن ماله مناره وقبّه = يضم ( عبدالله ) و( عبّاد الاصنام ) !
دام الصلاه تجوز في كل خبّه = مالله بموزمني على قض الأهرام
احتاط .. واحرص .. وافتطن .. واتنبّه = وابذل سبب والغيب له رب عـلاّم
هذا نظام مطبّقه ما نشبّه = الظن ماله وجه معروف وانظام
بعض العرب سيماه ما تنتسبّه = امطوع وعاصي وناصح ونمام !
هبّه سواتي كل ما جاك هبّه = اللي يجيد الدور في كل الأفلام
ووجه ٍ كريه إليا عرض ما تحبّه = لكنّه حزامك ليا احتجت لـ / احزام !!
وبعض العرب ما تمدحه ما تشبّه = الله هو اللي عزّ الأمه بالإسلام
ياللي حمست البن زلّه وصبّه = الراس فيه اعماس و اصداع واضرام
وقفت حاير في طريق المحبّه ؟ = قدام يا ركب المواليف قدام
اخطيت يا بو عنق ٍ ابيض ولبّه = ياللي مواصيلك من العام للعام
يلعب هواك بقلب ما ينلعبّه = لين إن قلبي روّح أمزاع وأقسام
أزريت فيه الله ربي وربه = دوب أتلزّم في جنوبه تلزّام
صدري حما ما غيرك أحدٍ يطبّه = واسهمت فـ / احماية محاديبه إسهام
ومن عقب ما حال أرنبه دون ضبّه ؟ = فكّيت باب احماه من ( يمّة الشام )
شرّعت صدري والهبايب تهبّه = وضاع النسم بين الذواري والأنسام
عيت تقر أوضاعي المستتبه = وأزريت احرك شي في ( وضعي العام )
كثرت مشاريه الأهل والأحبّه = ما كن عندي عقل وإدراك وإلمام
شرهه بلا سبّه وشرهه بسبّه = كنّي وكيل آدم على كل الآنام
وخلاصة الموضوع شكله ولبّه = حقيقة ٍ تجلا غباشات الأوهام
لا صار كل راس ٍ تشوفه تحبّه ؟ = لا بدّك اتسلّم على روس الأقدام !!
[/poem]


وسلامتكم ..،