تدل بيت أهلها..

((حبيبتي.. وشلون اصبّحك بالخير

.............................. وأنتي صباح الخير والخير كلّه




صبح الندى والعشب والغصن والطير


.............................. وصبح الغيوم اللي علينا مطلّه




أنتي صباحات السعد .. والتباشير

.............................. على وجيهٍ بـ الرضا مسفهلّه




دامك صباحي وين مـ أروح و أسير

.............................. والله مـ أدوّر فوق راسي مظلّه




جيتي و صارت لك ضلوعي جماهير

.............................. ويتل منّها شوقي اللي يتلّه




عقب المصايب والتعب والمشاوير

.............................. وعقب السنين الممحله والمملّه




جيتي وفي عينك دموع المعاذير

.............................. ولها ولجل أرضى عليها تهلّه




ومدام جيتيني فـ أنا حالي بخير

.............................. لو كان جرحي ما أسترته الأجلّه




جيّتك هذي غير وأنتي بعد غير

.............................. مثل الوسم لاجا فـ وقته وحلّه




تزهر بها قيعان قلبٍ مداهير

.............................. وترد معها روح خـلٍ لـ خــلّه




يامرحبا يـ أغلى وأعز المسايـيـر

.............................. وأغلى المشاعر ( بيت اهلها تدلّه )




تربعي بين الحشا والازارير

.............................. وأخذي على ترويقة البال .. فلّه




والا أصبري .. بـ أطيّر القلب تطيـيـر

.............................. وأنتي تعالي وأجلسي في محلّه




عروق قلبـي لـك دلالٍ مبـاهيــر

.............................. صفيتها دلّه .. ودلّه .. ودلّه




سقت الغلا لك ... والنوايا مغاتـيـر

.............................. ولاهمّني حقد القلوب المغلّه




مدري صباح الخير والا مساء الخير

............................. بس المهم أن وجهك الخير كلّه ))



مطلق بن شويه
صح لسانك وقلبك ..
سهل ممتنع لله درك ..

تحيه وسلام لقلبك ،

اخوك ومغليك . .