ان قرى التلميذ والا ماقرى !!

على المتضرر اللجؤ الى أقرب محكمه


.................................................. ......

بالغرام البارحه كني على جمر المليله
……………………..………قام يطويني بيّدينه مثل طي الشـناني
قام يعطيني ثقال الهم من صاعه وكيله
………………………..……وقمت أعد الهم وآعد الدقايق والثواني
كني البارح غريب ٍ سكته سكه طويله
………………………..…...سج رجله لاعزم ســجة غبا والا بياني
وويش أسوي دام قلبي غيره قلوبٍ عليله
…………………………قد خذاها الحب وان كانه حداها ماحداني
وقد سمعت اللي يقول الغايه تبرر وسيله
…………………………..…وانجبرت أحيا بمبدا خلها والعمر فاني
قلبي أخضر والحمام اللي هدل واسمع هديله
……………………….…فز له قلبي على طاريك وطيوفك وزاني

ويش اقول ان كان مالي عن بياض الطرس حيله
………………....لاابتديت أسمع صدا الهاجس وهو بين المحاني
ولابديت اضما رعود الغيث والبرق ومخيله
……………..…….ولاانجبرت أرقب نجوم الليل وســهيل اليماني
ولابديت اذكر خليل ٍ ماتجمل مع خليله
……………………..……….لاغزاه الدمع وجروحه بخفاقه ثماني

والقصيد اللي تمادا في الورق لو شد حيله
………………..……….والله انه غارق في الحب وعيونك مواني
ووالله انه مايضيّع سكته دامك دليله
…………………..….…والأكيد اختارك ويرفض معك واحد وثاني
ولو يجيله يسترد الحب مره مايجـيـله
…………………...…..يسترد الخافق اللي راح معك ولابـكـاني
ووالله ان الحب صعب ٍ معك اباحصل بديله
……………………...ولو لقيت الغير بستانه ثمر والقطف داني
ماذكرت الا انت ياعطر القصيد وياخميله
……………………..…..لو تذكرت الرفيق اللي بلاسبه جفاني

الرفيق اللي يصب الحقد لويربط صميله
……………………..…….قد عرفته قبل يرميني وياليته رماني
راح واقفا يمكن انه لاابتعد يبرد غليله
……………………..والا انا صوب الفعول الناقصه قلبي ثناني
وعادة الدنيا ولوتعطي عطاياها هزيله
…………….….ولاانتظرت الطيب من شخص ٍ مغفل او اناني

كل رجال ٍ بدرب المرجله يطرق شليله
………………..….والردي يبقى ردي لو عاش بـ كبار المباني
ودامها ميدان كل ٍ يمتطي صهوات خيله
…………….….والرجل عينه على المشراف لو وقته طمـاني
وأنت ياللي ماقدرت انساك والخافق مقيله
………………….في عيونك لارويت الشوف رمشك مارواني

لاتصدق فـ الف ليله بين يوم وبين ليله
……………………….…الليالي مايله لو جا بها بعض أتزاني

ولو يفوح من الفناجيل الغلا بنه وهيله
……………………….شرط لاعن لمداه وريحته لو ماسقاني

ومن لساني خذ قراح الشعر والا سلسبيله
……………….خذ قراح الشعر والا سلسبيله من لســـاني

والا انا دوم الغريب اللي مثل عابر سبيله
…………..….…….غير غربة عينك الحورا بقت غربة زماني
لاتخليني مادام الوقت صافط لي قليله
…………….….وأن عطاني ماعطيته وان عطيته ماعطاني

يمكن اني مارضيت الأخذ من يد ٍ بخيله
………….ولارضيت اركض ورى المقفي عجل واترك مكاني

صابر ٍ وآعرف وقتي زين واشيل الثقيله
………..………والصبر ماعاب جوع الذيب والهرش العماني

والحياه دروب واللي واطي ٍ درب الفشيله
………………..…….لايلوم النفس ويعـّود بعد فـوت الأواني

وان سقط تمر الرجا مااسد جوعي من نخيله
………..….ولاهويت أخضع رجا لو جرت الصـوت الســواني
لي لياضاقت عليّ الأرض سجده وتـهْليله
………………والعزا أني مانطقت الزيف ولسـاني حصاني



























بندر بن محيا